Babasy erlik jasaǵan kúni týǵan ul

Ál­ginde salmaqty Zákeń áp-sátte abyr-sabyr bolyp, erip sala berdi. Qushaǵyna qushyp, betinen súıip:

− Kimniń balasysyń? – dedi.

− Atalardyń balasymyn.

− Atalaryńnyń aty kim?

− Ábdir, Sársen, Sádirbek, Núrken!

Qulaq eleń ete qaldy. Jaýaby qyzyq­tyr­­dy.

– Batyr aǵamyzdyń kishi shóberesi bul. Maǵan týǵan jıen ári. Baýyzdaý qudam Áýkeńniń nemeresi, – dep tanystyryldy.

Áýkeń − Ábýbákir Ábdirov alys-jaqynǵa belgili kisi. Ásirese, qaraǵandylyqtardyń kóbi jaqsy biledi. Uzaq jyl qoǵamdyq tár­tipti saqtaý, tynyshtyqty qorǵaý jolynda jumysty jumyldyrǵan adam. Qalanyń beımazalaý aımaǵy Maıqudyqty kózge qorash etpeýge sińirgen eńbegi el esinde. Keýdesi marapat belgilerge toly, polkovnık sheninde jetpistiń jotasyna shyqqaly otyrǵan ardaqty azamat.

Eń bastysy Núrken batyrdyń et baýyr inisi turǵysynda jurt kóńiline odan saıyn jyly. Dańqty aǵasyna sheksiz qurmetimen, qasterin asyrýǵa ystyq ynta-yqylasymen súıinishti jan.

«Sý súzilmeıdi, súıek úzilmeıdi» degen osy-aý shyǵar. Bir baıqaǵannan batyldyǵy, zerektigi súıkimdi Dáýlet esimdi botaqan Ábdirdiń qara shańyraǵyn saqtap qalǵan Sárseninen tamyr jaıǵan butaq eken. Áýkeń ákeden jalǵyz ul, ózinen eki ul bolsa, ekeýinen atustar nemereler súıý jazypty. Ki­shisi álgi sańqyldaǵan jetkinshek.

Jáne bir ǵajaby, Dáýlet Núrken ata­synyń áıgili erligin jasaǵan kúnge tus­pa-tus dúnıege kelgen. 1942 jyly 19 jel­toq­sanda Stalıngrad maıdany shebine entelegen tankterdi joıý úshin áýege kóterilip, tap­­syrmany oryndaý kezinde jalyn shar­pyǵan ushaǵyn jaý kúshi shoǵyrlanǵan tusqa baǵyttap, qaharmandyqpen qaza tapqan bolatyn batyr. Sáıkestik pe, Jaratýshy ıe jazýy ma! Qyrshyn ketken qyran arýaǵyn jań­­ǵyrtýǵa Alla taǵala yqylasy túsýi me deı­siń.

– Men ákem Sársen 49 jasynda ózi eń­bek etetin shahtadaǵy apatta opat bolǵan soń Baǵjan ájeniń baýrynda óstim. Ájem aǵaly-inili úsheýden qalǵan jalǵyz tuqym ekenimdi aıtyp, qara shańyraqty saqtaýyma jetkizýdi, urpaqty bolýymdy tileıtin ja­ryqtyq. Búginde aq tileýin bizge berip, áýle­timiz keńeıdi. Adam óziniń sońynan ergen urpaqqa qarap kóńil jubatar, oshaq oty ósh­peýine úmit eter ǵoı. Danııaryma tıgen qara shańyraqtyń shyraǵyn Dáýletim de jar­qyratar dep táýbe etemin ishteı, – deıdi Áýkeń.

Bıyl jazda Núrken batyrdyń týǵanyna 100 jyl tolady. Úzilmegen urpaq, sónbegen shyraq bar. Demek batyr rýhy jasaı beredi.

Aıqyn NESIPBAI

Qaraǵandy