«Astana adaldyq alańy» jobasyn iske asyrýǵa qatysty qala ákimine Memlekettik qyzmet isteri jemqorlyqqa qarsy kúres jáne sybaılas departamentiniń basshysy Jazıra Jylqyshıeva baıandap berdi. Onyń aıtýynsha, joba aıasynda astanalyq departament 2019 jyly óziniń keńse formatyn ózgertken.
«Búgin MQIAD qyzmetkerleriniń jumysynda «Open space» tehnologııasy qoldanylýda. Buryn basshylyq jeke otyratyn edi endi qyzmetkerlermen birge bir kabınette otyrady. Ońtaılandyrý aıasynda biz qatardaǵy qyzmetkerlerdiń eńbekaqy mólsherin arttyrýǵa qol jetkize aldyq. Bizdiń departamenttiń tájirıbesin ákimdik basqarmalaryna baǵynysty mekemelerde de qoldanýdy usynamyz», dedi Jazıra Jylqyshıeva.
Departament basshysy osy jyly «Astana – adaldyq alańy» jobasy aıasynda júzege asatyn is-sharalar turmystyq deńgeıdegi, densaýlyq saqtaý, bilim berý, turǵyn úı-kommýnaldyq sharýashylyǵy, sáýlet jáne qala qurylysy salasynda turmystyq jemqorlyqty tómendetýge baǵyttalatynyn málimdedi. Osyǵan baılanysty ákim Baqyt Sultanov sáýlet, qala qurylysy jáne jer qatynastary basqarmasy basshylaryna, sondaı-aq monıtorıng jáne jedel áreket etý ortalyǵyna jobalyq keńse ortalyǵyn ashýǵa qol ushyn berýge shaqyrdy.
Elorda ákiminiń aıtýynsha, qalanyń júıeli problemalar reıtıngisinde turǵan ózekti máselelerdiń biri – úlestik qurylys. Turǵyn úı qurylysyna úleskerlik qatysýdyń problemaly máseleleri boıynsha qala ákiminiń birinshi orynbasary Sergeı Horoshýn aıtyp berdi. Astanada barlyq turǵyn úı nysandarynyń qurylysyn aıaqtaýǵa baılanysty Jol kartasy ázirlengen.
Ákimniń birinshi orynbasarynyń aıtýynsha, Jol kartasyn júzege asyrý barysynda jáne vedomstvoaralyq komıssııanyń jumysy aıasynda úleskerlerdiń barlyq problemalyq máseleleri sheshiletin bolady. Sonymen qatar, aldaǵy tórt jylda 35 tozǵan jáne apatty úı súrilip, 750 turǵyny kóshiriledi dep josparlanýda. Qala ákiminiń aıtýynsha, «Azbýka jılıa» nysandaryna qatysty memlekettik saraptamadan ótken jobalaý-smetalyq qujattama 25 qańtarǵa deıin shyǵýy tıis.
Densaýlyq saqtaý salasyndaǵy aǵymdaǵy jaǵdaı týraly qala ákiminiń orynbasary Amanshaev Ermek baıandady. Onyń aıtýynsha, qalalyq emhanalar men aýrýhanalardyń jumysyna kelip túsken shaǵymdardy sany ótken aptada 98 qurady, aldyńǵy apta kórsetkishtermen salystyrǵanda bul 10% - ǵa tómen.
«Daýly máselelerdiń jıi týyndaýyna baılanysty turǵyndar kóbine emhanalardyń qyzmetine shaǵym túsiredi. Shaǵymdardyń kóbisi medısınalyq qyzmetkerlerdiń moraldy-etıkalyq tártibine, dárigerdiń qabyldaýyna jazylý, kezek máselesine qatysty shaǵymdanady. Atalmysh máseleler boıynsha tıisti medısınalyq mekemelerdiń basshylyǵyna eskertýler jasaldy», - dedi E. Amanshaev. Ol, sondaı-aq, elordadaǵy muz qalashyqtarǵa kelýshiler sany búgingi tańda 30 myńǵa jýyqtaǵanyn atap ótti.
«Bul – óte jaqsy kórsetkish. Esil aýdanyndaǵy muz qalashyqtarǵa 14 myńnan astam adam keledi. Elordada uıymdastyrylǵan barlyq muz aıdyndary men qalashyqtarynda ár demalys kúni túrli is-sharalar ótkiziledi. Muz aıdyndarynda jaraqat alý oqıǵalaryn boldyrmaý sharalary júrgiziledi. Másele bizdiń turaqty baqylaýymyzda», - dedi Amanshaev.
Astana ákiminiń orynbasary Malıka Bekturova «Sergek» kameralaryn ornatý jumystarynan habardar etti. ««Sergek» foto-beıne baqylaý kameralary qalanyń barlyq aýdandarynda ornatylǵan. Jol qıylystarynda 200 kamera engizildi. Búgingi tańda qalada 1536 «Sergek» kamerasy jumys isteýde. Bolashaqta Astanada azamattardyń tulǵalaryn anyqtaýǵa múmkindik beretin kameralar ornatylady dep josparlanýda. Pılottyq jobany QR IIM iske asyratyn bolady», - dep málimdedi M. Bekturova.
Aýdan ákimderiniń esebin tyńdaǵan Baqyt Sultanov metalldy qabyldaý pýnkteri qyzmetine jasalǵan jaǵdaıǵa tosqaýyl qoıýǵa jáne lıýk qaqpaqtaryn, elektr kabelderin, basqa da metalldardy urlaýǵa qatysty problemany sheshýge múmkindik beretin is-sharalardy júzege asyrý jáne qoldanystaǵy zańnamaǵa tıisti ózgeristerdi engizý boıynsha usynystardy keltirýdi tapsyrdy.
«Ashyq qudyqqa qulap qalǵan qyzdyń qazasymen baılanysty qaıǵyly oqıǵadan keıin biz ashyq qudyqtarǵa, olardyń qaqpaqtarynyń urlanýyna, sondaı-aq, qaqpaqtardy basqa materıaldan jasaýǵa qatysty máselelerdi birneshe márte talqylaǵan bolatynbyz. Ashyq qudyqtarǵa qatysty jumys máselesin túıindeı kele, qatardaǵy jumyskerlermen qosa, olardyń jetekshileriniń de tapsyrmaǵa nemquraıly qaraǵandyǵyn kórip otyrmyz! Aýdan ákimderiniń jaýapty orynbasarlary men ınvestısııalar jáne kásipkerlikti damytý; otyn-energetıkalyq keshen jáne kommýnaldyq sharýashylyq; kólik jáne jol-kólik ınfraqurylymyn damytý basqarmalary basshylarynyń jaýapty orynbasarlaryna eskertýdi sońǵy ret jasap otyrmyn. Másele jaqyn arada sheshimin tappasa, jaýapty tulǵalardy tártiptik jaýapkershilikke tartýdy tapsyramyn»,- Baqyt Sultanov.
Apparattyq keńes barysynyń tolyq nusqasyn tómendegi beınematerıaldan kórýge bolady. Turǵyndar Astana ákimdiginiń apparattyq jıynyn endi ashyq formatta apta saıyn kóre alady.
