Baıqaýǵa áleýmettik, qoǵamdyq problemalardy sheshýge jáne ózderiniń jomarttyǵymen basqalardy meıirimdilikke yntalandyrýǵa úles qosyp júrgen jeke jáne zańdy tulǵalar qatysa alady. Jobany QR Tuńǵysh Prezıdenti – Elbasynyń qory, Qazaqstannyń Isker áıelder qaýymdastyǵy jáne «Habar» agenttigi birlesip júzege asyryp otyr.
«Bizdiń maqsatymyz – elimizdegi azamattyq bastamalardy qoldap, azamattyq jáne adamgershilik boryshyna adal erekshe tulǵalardy tanytý jáne olardyń isterin elimizge, jastarǵa nasıhattaý. Baıqaý elimizdiń búkil aýmaǵynda ótkizilip jatyr» dedi Astana qalasy ákimdiginiń baspasóz ortalyǵynda ótken jıynda QR Tuńǵysh Prezıdenti – Elbasy qory atqarýshy dırektorynyń orynbasary Sultan Aıtjanov.
Uıymdastyrýshylardyń aıtýynsha, byltyr qarashada bastalǵan baıqaýǵa qatysýshylardy irikteý jumysy osy jyldyń aqpan aıyna deıin júrgiziledi. Jeńimpazdar Alǵys aıtý kúni (1 naýryz) merekesiniń qarsańynda belgili bolady.
«Astana qalasyndaǵy isker áıelder qaýymdastyǵy «Jas qanattar» uıymynyń kóshbasshysy Ásel Qapalova laýreattar bes atalym boıynsha anyqtalatynyn jetkizdi. Atap aıtqanda, salt-dástúrge baılanysty qaıyrymdylyq qyzmet kórsetken adamdarǵa qoldaý kórsetýge baǵyttalǵan «Asar» atalymy, bilim berý, ekologııa jáne kóriktendirý salasynda týǵan ólkege kómek kórsetetin jandarǵa taǵaıyndalǵan «Týǵan jer» syılyǵy, tegin kómek kórsetip, ıgi ister aqtaryp júrgen jandarǵa arnalǵan «Meıirim jolynda» atalymy bar. Sondaı-aq erlik jasap, jankeshtilik tanytqan batyrlarǵa beriletin «Batyl júrek» jáne qaıyrymdylyqty dáriptegen jýrnalıster men ujymǵa beriletin «Qaıyrymdylyq tarıhy» atalymy da bar.
Maıgúl SULTAN,
«Egemen Qazaqstan»
