Kelgen boıda úırengenin kádege jaratsam dep talpyndy. Bas-aıaǵy 2-3 jyldyń ishinde 5 bıznes jobany qolǵa alyp, 30 shaqty adamdy jumyspen qamtyp úlgerdi. Biz tilge tıek etip otyrǵan azamat – shymkenttik jas kásipker Ashat Nurlybaev.
Ashat ýnıversıtet qabyrǵasynda júrgen shaǵynda-aq qala turǵyndaryna sapaly, baǵasy qalta qaqpaıtyn kofehana ashýdy oılady.
– Eń alǵash kofehana ashý týraly oı Starbucks, McDonald’s syndy tanymal kompanııalardyń óniminen dám tatqan shaqta kelgen. Keıinnen ishki naryqty zerttedik. Áýeli qala turǵyndarynyń kofege degen qyzyǵýshylyǵyn bilý maqsatynda arnaıy kólikte kofe satýdy bastadyq. Qaladaǵy joǵary oqý oryndary, saýda ortalyqtary men bank ǵımaratynyń aldynda turǵyndarǵa dámdi kofe usyndyq. Tutynýshylarymyzdyń sany arta bastaǵan soń, Ǵ.Ilıaev kóshesi boıynan kishigirim dúńgirshek ashtyq. Keıinnen jeke ǵımarat jaldap, erekshe dızaında jasalǵan ortalyqta qyzmet kórsete bastadyq. Bizdiń hosh ıisti kofemizdiń baǵasy stýdentterdiń qaltasyna qonymdy. 0,5 lıtrlik kofe nebári 300 teńge. О́ıtkeni negizgi tutynýshylarymyz da osy jastar, – deıdi Ashat Nurlybaev.
Osylaısha naryq zańdylyǵymen básekelesterin ádil jeńe bilgen jas kásipker Shymkentte «Procoffee» atty kofe ortalyǵyn ashty. Búginde joǵary oqý oryndary men stýdent jastar jıi shoǵyrlanatyn jerlerde atalǵan ónim brendke aınalyp úlgerdi.
Anyǵynda, Shymkent dese jyldyń tórt mezgili saýda qyz-qyz qaınaǵan bazary kóp meken elesteıdi. Shahar turǵyndarynyń boıyndaǵy osy bir pysyqtyq olardyń birden kásipke beıimdelýine kóp septigin tıgizse kerek. Shıraq Ashat ta osy toptyń bel ortasynda júrip shyńdalǵan.
Qalalyqtarǵa kofe ishý mádenıetin úırettim dep toqmeıilsip qalmaı, kezekti jobalaryn da ret-retimen qolǵa alǵan. Solardyń biri – beınebaqylaý ónimderin satýmen aınalysatyn «Protech» dúkeni. Budan bólek, izdenimpaz jastyń «Pro-professional» brendine qarasty «Profootball» dúkeni taǵy bar. Munyń barlyǵy «Pro group» komandasynyń bólimsheleri. Bir sózben, halyqqa sapaly, joǵary deńgeıde ónim usyný maqsatynda dúnıege kelgen ataýlar megapolıs jurtshylyǵynyń aýzynda jıi aıtylyp júr.
«Jigitke jeti óner de az» demekshi, sportty janyna serik etken Ashat bul salaǵa da qarjy salyp, tabys kózin tapty. Qazaqtyń qarakóz baldyrǵandarynyń boıyndaǵy fýtbolǵa degen úmitti oıatý maqsatynda shaharda «Sanlın» fýtbol akademııasynyń bólimshesin ashty. 2014 jyly qurylǵan, elimizdiń 9 qalasynda jumys isteıtin akademııada jas óskinder kásibı jattyqtyrýshylardan dáris alady.
Qazirgi tańda jastardyń bir ǵana mamandyq ıesi atanyp qoımaı, qyzyǵýshylyǵy bar mamandyqtardy kóptep ıgergeni jón. Mamandyǵyna shyn berilgen jandar kez kelgen salanyń eńse tiktep, damýyna septesetini anyq. Bul rette memlekettiń de jas kásipkerlerge kórseter kómegi az emes.
– Túrli issaparlarmen álemniń 15 shaqty elin araladym. Árıne shetelderdegi úlken qalalarmen Shymkentti salystyrýǵa kelmeıdi. Alaıda ózim ósken qalany erekshe jaqsy kóremin. Qytaıda halyq kóp, kóshedegi keptelisterden aıaq alyp júrý múmkin emes. Sondyqtan bir kúnde bir ǵana jumys isteı alasyz. Al munda bir kúnde kemi 5-10 sharýańyz tynady. Qalamyz megapolıs mártebesin alyp, damyp keledi. Endigi murat – shetelde on jyl júrip jınaǵan bilimimdi, múmkindigimdi týǵan jerimde paıdaǵa jaratý. Elimizde jastardyń kásipkerlikpen aınalysýyna memleket tarapynan barlyq jaǵdaı jasalǵan. Barlyq salada ózara básekelestik bar. Al básekelestik bolǵan jerde sapa artady, – dep aǵynan jaryldy jas kásipker.
Nurshat TО́KEN,
«Egemen Qazagstan»
