El ishindegi elenbeı júrgen óner ıesi men qoly epti ismerlerdiń jáne kóshbasshy jastardyń tanylýyna jol ashqan festıvalda án shyrqalyp, kúı tartyldy. Otty jyrlar oqylyp, fotosýret baıqaýy da ótti. Solardyń bárinen Nurlan Jartybekov esimdi ismer jigittiń óneri asyp túsip, eldi tańǵaldyrdy desek, artyq aıtpaımyz. Dúıim jurttyń tańdaıyn qaqtyrǵan Nurlan ilmektep toqý óneri boıynsha dúnıe júziniń sheberlerin shań qaptyryp, álemdik rekord ornatqan qas sheberdiń ózi eken. Ilmektep toqýdyń sheberi 72 saǵat boıyna toqtamastan jumys istep, ıirilgen júnnen sharf toqyp shyqty. Toqyǵan moıynoramasynyń uzyndyǵy 35 metrge jetip, jerlesimiz Qazaqstannyń rekordtar kitabyna tirkeldi. Túrli toqyma buıym jasap, onysyn satyp, sharýasyn dóńgeletip otyrǵan jaspen biz osylaı tanystyq.
Taıaýda ismer jigitke habarlasyp, kásibi týraly az-kem suraǵan edik.
– Maǵan toqyma ónerin birinshi synypta oqyp júrgenimde anam úıretti. Tórtinshi synyptan bastap toqyma buıymdarymdy satýdy kásipke aınaldyra bastadym. Mektepti támamdap, joǵary oqý ornyn bitirgennen keıin de osy kásipten qol úzbeı, ári qaraı jalǵastyrýdy jón dep sheshtim. Byltyr Bilim jáne ǵylym mınıstrliginiń jańadan óz isin bastaıtyn jastardy qoldaýǵa arnalǵan Zhas Progect atty jobasyna qatysyp, jeńimpaz atandym. Osy Zhas Progect arqyly alǵan grantty kásibimdi odan ári damytýǵa arnadym. Qazir Qapshaǵaı qalasyndaǵy «Baldáýren» respýblıkalyq oqý-saýyqtyrý ortalyǵynda toqymany úıretemin. Kópshilik toqymany erlerdiń isi emes dep oılaýy múmkin, alaıda eń bastysy bul ózime unaıdy, – dedi ol.
Shynynda da qımyl-qozǵalysy qıyndaǵan, túrli dárejedegi sal aýrýyna ushyraǵan baldyrǵandar úshin toqymamen aınalysýdyń paıdasy zor eken. Nurlannyń erinbeı-jalyqpaı balalarmen jumys istegeniniń nátıjesinde biraz balanyń densaýlyq jaǵdaıy 20 paıyzǵa deıin jaqsarypty. Bir sózben aıtqanda, Nurlannyń ádisin eńbekpen emdeýdiń keremet úlgisi deýge bolady.
Bizdiń keıipkerimizdiń bos ýaqyty az. Ár kúnin neshe túrli buıym toqýmen, bilgenin baldyrǵandarǵa úıretýmen ótkizedi. Toqý jyldamdyǵymen eldi tańǵaldyrǵan jigit aı saıyn bir ózi 500 balaǵa kishkentaı aıaqkıim toqyp úlgeredi eken. Úlkenderge arnalǵan kıimderdiń 100-
150-in daıyndap úlgeredi. Basqa da bókebaı, qolǵap, shalma, baskıim, kúrteshe syndy kıimniń neshe atasyn toqyp, túrli ulttyq oıý-órnekpen áshekeılep, satyp úlgeredi. Jan jary da qolǵabysyn tıgizedi.
– Jyldamdyǵym óte joǵary, mashınamen birdeı toqımyn ǵoı, – dep kúledi ózi.
Qolynan shyqqan buıymdaryna suranys joǵary, daıyn bolǵandaryn el qýana satyp alyp jatyr.
Nurlan qazir jan jarymen birge eńbektenýde. Áli jeke baspana satyp alyp ta úlgermepti. Endigi jospary úı alý, biraz adamnyń basyn qosyp, óziniń isin birlesip atqaratyn jumyskerler daıyndaý, sóıtip kásibin odan ári úlkeıtý.
– Toqyma óneri shetelde ǵana jaqsy damyǵan, Qazaqstanda joq. Ulttyq toqyma buıymdarymyzdyń neshe túrlisin elimizde shyǵarýdy jolǵa qoısam degen armanym bar, – dedi bizge.
Ol armanyn oryndaý úshin qarjylaı qoldaý kerek. «Bolam degen balanyń betin qaqpa, belin bý» degen. Sál demeý bolsa Nurlan Jartybekovtiń isi de ilgerilep ketkeli turǵany anyq.
Qalmahanbet MUQAMETQALI,
«Egemen Qazaqstan»
