– Qazaqstanǵa alǵash kelýim. Bes aıdan beri eki eldiń arasyndaǵy mádenıet jáne seriktestik máseleleri boıynsha jumys istep jatyrmyn. Búgin sáni jarasqan Nazarbaev ortalyǵynda bolyp, memlekettiń tarıhyna súńgip ketkendeı kúı keshtim. Elbasy kitaphanasynda Qazaqstan Prezıdenti Nursultan Nazarbaevtyń marapattar ekspozısııasy erekshe áser etti. Bul jerdi asyqpaı, ár eksponattyń qyzyqty tarıhyna úńile otyra aralaý kerek, - dedi Lor Kasten.
Sonymen qatar Fransııa ókili búginde eki el arasyndaǵy iskerlik jáne mádenı baılanystar óte joǵary deńgeıde ekenin, alaıda ony, ásirese, bilim men týrızm salasynda tereńdete túsý kerektigin atap ótti.
–Týystarym men dostaryma Qazaqstan týraly aıtqanda, eń birinshi aýyzǵa iligetini - qazaq halqynyń sheksiz qonaqjaılyǵy, qonaq kúte alýy, jaıdary minezi men keńpeıildigi. Soǵan qosa Qazaqstan men úshin Abaı uǵymymen egiz. Onyń shyǵarmalary ómirlik fılosofııasynyń tereńdigimen janyńdy baýrap alady. Ár kesh saıyn dostaryma Qazaqstan týraly fotosýretter jiberemin. Bul kez kelgen halyqtyń dástúri men mádenıetin keń tanytyp, pash etýdiń eń bir jyldam tásili dese de bolady. Buǵan tym áýestenip ketkenim sondaı, jibergen sýretter men aıtqan málimetterden keıin týystarym men dostarym Qazaqstandy qatty kórgisi keletin boldy.
