Kabar.kg: Jańa býyn - Qazaqstannyń eń orasan jetistigi
Qyrǵyzstannyń Kabar.kg jańalyqtar agenttigi bul jańalyq týraly aqparat taratty. «Men kórip otyrǵan qazaqstandyqtardyń jańa býyny - Qazaqstannyń eń orasan jetistigi, Memleket basshysy retindegi meniń jumysymnyń nátıjesi. Sizdermen kezdesip otyrǵanym úshin óte baqyttymyn. Men Qazaqstanda Jastar jylynyń bastalýymen quttyqtaımyn» dedi Elbasy.
Agenttik Elbasynyń óz sózinde jastar - básekege qabilettiliktiń negizgi faktory ekenin aıtqanyn jazǵan. «Biz álemniń damyǵan elý eliniń qataryna endik. Biraq, bul áli de az. Qazirgi tańda memleketter arasynda ǵana emes, adamdar arasynda báseke qyza tústi. Kreatıvti býyny bar memleket jeńimpaz bolyp shyǵady. Men bul jigerdi Sizderden kórip otyrmyn» dedi Elbasy.
Sondaı-aq agenttik Prezıdenttiń búgingi tańda ómirdiń barlyq salasy, bilim de, jumys ta, ózara qarym-qatynas ta ózgerip kele jatyr degen sózine toqtalǵan. Sondyqtan «bizdiń memleket ýaqyt alǵa tartyp otyrǵan tegeýrinderge jaýap bere alýy kerek» dedi Memleket basshysy.
Regnum.ru: Jastar - básekege qabilettiliktiń negizgi faktory
Regnum aqparattyq agenttigi «N.Nazarbaev Qazaqstanda Jastar jylyn ashty» degen taqyryppen maqala jarııalady. Onda Memleket basshysynyń qazaqstandyqtardyń jańa býyny - Qazaqstannyń eń orasan jetistigi ekendigine erekshe toqtalyp, Jastar jylynyń bastalýymen quttyqtaýyn keltirgen.
«Bizdiń kóz aldymyzda jańa jahandyq órkenıet kele jatyr. Sıfrlyq qoǵamnyń, ekonomıka men bilimniń dáýiri keldi. Sol úshin bizdiń memleket ýaqyt alǵa tartyp otyrǵan tegeýrinderge jaýap bere alýy kerek», dedi Memleket basshysy. Sondaı-aq Elbasy óz sózinde sol sebepti jastar - básekege qabilettiliktiń negizgi faktory ekenin atap ótti. «Elimizdiń bolashaǵy sizderdiń bilimderińiz ben patrıottyq sezimderińizge tikeleı baılanysty» dedi N.Nazarbaev.
Xinhua: Qazaq Respýblıkasyn eldiń resmı ataýy retinde usyndy
Xinhua agenttigi Qazaqstan depýtattary Qazaq Respýblıkasyn eldiń resmı qoldaný týraly usynǵanyn habarlady. Maqalada «Aq jol» partııasynyń tóraǵasy Azat Perýashevtyń Májilistiń plenarlyq otyrysynda Úkimet basshysynyń atyna depýtattyq saýal joldap, onda Qazaq Respýblıkasy ataýyn qaıta engizý týraly usynysy jazylǵan. Sonymen qatar depýtat tarıhı derekterdi de keltirgen.
«2020 jyly memlekettilik turǵysynan bolashaq Táýelsiz Qazaqstannyń irgetasyna aınalǵan, KSRO quramyndaǵy Qazaq Respýblıkasynyń, naqtylap aıtamyn, Qazaq Respýblıkasynyń qurylǵanyna 100 jyl tolady. Qazaqstan ataýymen qatar resmı túrde qoldanylýy úshin Qazaq Respýblıkasy ataýyn qaıta engizý múmkindigin qarastyrýdy usynamyz» dep málimdedi depýtat A.Perýashev.
Aıta keteıik, mundaı bastamany 5 jyl buryn Memleket basshysy Nursultan Nazarbaev «Máńgilik El» tujyrymdamasyn talqylaý barysynda ózi kótergen bolatyn.
Mádına JÁLELQYZY,
«Egemen Qazaqstan»
