Baspasóz qyzmetiniń málimetinshe, J.Massneniń mýzykasyna qoıylǵan XX ǵasyrdyń kórnekti horeografy K.Makmıllannyń erekshe kórinisti «Manon» baleti «Astana Opera» teatrynda oryn alǵan premerasynan bastap-aq kórermenderdiń ystyq yqylasyna bólendi. «Qazir qarqyndy daıyndyq jumystary júrgizilýde, solıstermen usaq-túıek jaıttardyń bárin qosa tolyqqandy jumys jasaýdamyz.
«Manon» baletinde óte názik, biraq erekshe mańyzdy dúnıeler kóp. «Astana Operanyń» balet trýppasy óte myqty. Buǵan deıin birge áriptes bolǵan adamdarmen jumys jasaý óte keremet, sebebi aramyzda meniń ótken jolǵy jumys barysymda oryn alǵan ózara túsinistigimiz bar. Basty partııalardy eki jyl buryn oryndaǵan solıster ázirlep jatyr, qaıta oralǵan kezimde birshama eseıgen ári tájirıbe jınaqtaǵan ártistermen kezdesý qandaı keremet edi. Qazir olar óz rólderin oryndaýda biraz kemeldikke jetken», – deıdi qoıýshy-baletmeıster Karl Bıornett. Eske salar bolsaq, Kennet Makmıllan baletke arnalǵan lıbrettony abbat Prevonyń «Kavaler de Grıe men Manon Leskonyń oqıǵasy» romanynyń jelisi boıynsha jazǵan. Orkestrge laıyqtap, aranjırovkasyn jasaǵan – Martın Iets. Dekorasııalar jáne kostıýmder boıynsha sýretshi – Nıkolas Georgıadıs. «Astana Opera» sahnasynda qoıylymdy júzege asyrǵan baletmeısterler Karl Bıornett, Patrısııa Rýann.
Dekorasııalar boıynsha úılestirýshi – Chınsıa Lo Fasıo, kostıýmder boıynsha úılestirýshiler – Natalııa Stıýart, Arasel Dosmuratova, jaryq boıynsha sýretshi – Iаkopo Pantanı. «Astana Opera» Sımfonııalyq orkestri qoıýshy dırıjer Arman Orazǵalıevtyń jetekshiligimen óner kórsetedi. 30 qańtar kúni Manon partııasyn Qazaqstannyń eńbek sińirgen qaıratkeri Áıgerim Beketaeva oryndaıdy, kavaler de Grıe – Oljas Tarlanov. Lesko – Arman Orazov, Leskonyń kóńildesi – Qazaqstannyń eńbek sińirgen qaıratkeri Ánel Rústemova. G.M. myrza – Jánibek Imanqulov, Qart myrza – Rýslan Temirbekov, Qaraýyl basshysy – Oljas Mahanbetálıev, Madam – Altynaı Qaǵazbaeva, Kedeılerdi bastaýshy – Beıbarys Aqarys. «Astana Opera» balet trýppasynyń kórkemdik jetekshisi – Reseıdiń Halyq ártisi Altynaı Asylmuratova. Spektakldiń bastalýy saǵat 19:00-de.
