Jaıyq jaǵasynan arman qanatynda Almatyǵa attanyp, dúldúl dombyrashy dárejesine deıin jetken Qarshyǵa Ahmedııarov halyq ártisi, memlekettik syılyqtyń ıegeri, dáýlesker kúıshi, kompozıtor ǵana emes, talantty shákirtterdiń tálimgeri atanǵan ulaǵatty ustaz boldy. Eskertkish janyna jınalǵan jerlesteri birtýar óner ıesiniń dara qasıetteri, adamdyǵy men adaldyǵy týraly sóz órbitip, eske aldy.
Bes jasynda qolyna alǵan qazaqtyń qasıetti dombyrasy ómirlik serigi boldy. Qarshyǵa Ahmedııarov belgili kúıshilerdiń shyǵarmalaryn oryndap qana qoıǵan joq, ózi de 60-tan astam kúı shyǵardy. Talantty jastardyń talabyn ońdaǵan, ulttyq sananyń qalyptasýyna úlken eńbek sińirgen óner qaıratkeri retinde Qarshyǵa Ahmedııarulynyń esimi qurmetpen atalady,-dedi eskertkishtiń ashylý saltanatynda oblys ákimi Nurlan Noǵaev.
Dombyrasyn qolyna alyp tuǵyrǵa qonǵan kúıshi eskertkishi – QR Mádenıet qaıratkeri, músinshi Edige Rahmadıevtiń jumysy. «Qazaqstan» qonaq úıiniń janynan oryn alǵan eskertkishtiń bıiktigi 3,5 metr.
Qaı óner adamy úshin de týǵan jerdiń qurmeti bárinen bıik. Dúnıe júziniń sahnalarynda qazaqtyń kúıin kúmbirletip, ǵajap oryndaýshylyq sheberligimen tánti etken dúldúl dombyrashy Qarshyǵa Ahmedııarov týraly Farıza Ońǵarsynova: «Ketpese qany aýysyp, kúı sazyn han, qazy da tyńdar, sirá! Qanaty kók aspandy dara qushyp, samǵasyn kúı-Qarshyǵa!», dep jyrlaǵan edi. Poezııa padıshasynyń Atyraýdaǵy eskertkishine qarsy kósheden oryn alǵan kúı padıshahynyń qola beınesi eki alyptyń týǵan jer qushaǵyndaǵy máńgilik ómiriniń kórinisi ispetti áser qaldyrady.
Baqytgúl BABASh,
«Egemen Qazaqstan»
ATYRAÝ
