Is-shara Chıorch-Haýs atty brıtandyq astananyń tarıhı ǵımarattarynyń birinde ótti. Bul jerde 1946 jylǵy 17 qańtarda BUU Qaýipsizdik Keńesiniń eń alǵashqy otyrysy ótkizilgen.
Ulybrıtanııanyń Eýropa men Amerıka isteri boıynsha memlekettik mınıstri Ser Alan Dankan, QR Elshisi Erlan Ydyrysov jáne 2019 jylǵy 1 qańtarda BUU Qaýipsizdik Keńesinde Azııa-Tynyq muhıt tobynyń ókili retinde Qazaqstannyń ornyna kelgen Indonezııanyń Elshisi Rızal Sýkma brıfıngte sóz sóıledi. Is-sharaǵa Ulybrıtanııa Syrtqy ister mınıstrliginiń basshylyǵy men qyzmetkerleri, brıtandyq Parlament músheleri, birqatar elshi, iskerlik toptardyń ókilderi, sarapshylar jáne jýrnalıster qatysty.
Qonaqtar aldynda sóz sóılegen E.Ydyrysov Qazaqstannyń BUU Qaýipsizdik Keńesindegi jumysyn qorytyndylady. Eki jyl ishinde Qazaqstan ókilderi Qaýipsizdik Keńesiniń 1000-nan astam ashyq jáne jabyq otyrysyna, 38 BUU QK beıresmı kezdesýine qatysyp, 115 Qaýipsizdik Keńesiniń rezolıýsııasyna jáne 48 Tóraǵanyń resmı málimdemesine úles qosty.
2017 jylǵy 1 qańtarda QR Prezıdenti Nursultan Nazarbaevtyń BUU Qaýipsizdik Keńesine Saıası joldaýynda qamtylǵan Qazaqstannyń jeti basty basymdyqtarynyń biri – ıadrolyq qarýsyz álemge qol jetkizý. Osyǵan oraı Qazaqstannyń 2018 jylǵy qańtardaǵy BUU Qaýipsizdik Keńesindegi tóraǵalyǵynyń basty sharasy Prezıdent
N.Nazarbaevtyń tóraǵalyǵymen ótken «Jappaı qyryp-joıý qarýyn taratpaý: senim sharalary» taqyrypty joǵary deńgeıdegi brıfıng boldy. Debattardyń nátıjesinde qarýdy taratpaý janjaldy boldyrmaýdyń jan-jaqty strategııasynyń mańyzdy elementi retinde tanylyp, atalǵan taqyryp BUU Qaýipsizdik Keńesi Tóraǵasynyń málimdemesine qosyldy.
Qazaqstannyń BUU Qaýipsizdik Keńesindegi músheliginiń taǵy bir basymdyǵy Ortalyq Azııada beıbitshilik, qaýipsizdik, yntymaqtastyq jáne damý aımaǵyn qurý boldy. Osyǵan oraı Qazaqstan Aýǵanstanǵa túrli kómek kórsetýge erekshe nazar aýdardy. Elimizdiń tóraǵalyǵy kezeńinde Qaýipsizdik Keńesiniń músheleri kóp jylda alǵash ret Aýǵanstanǵa jergilikti jaǵdaımen tanysý maqsatynda sapar shekti.
«Sońǵy eki jylda Qazaqstannyń BUU-daǵy jetistikteri óńirdegi basqa elderdi sizden úlgi alyp, halyqaralyq arenadaǵy negizgi aktorlarǵa aınalýǵa yntalandyrady dep senemin», – dedi Memlekettik mınıstr A.Dankan.
Qazaqstannyń halyqaralyq arenadaǵy basqa jetistikteriniń qatarynda ol Kaspıı teńiziniń mártebesi jónindegi kóptegen pikirtalasty toqtatqan Aqtaý qalasyndaǵy Kaspıı mańy memleketteriniń Sammıtin, Qazaqstannyń Aýǵanstanda beıbitshilikti qaıta qurý jónindegi kúsh-jigerin jáne halyqaralyq bitimgerlik mıssııalarǵa qatysýyn atap ótti.
Indonezııanyń Ulybrıtanııadaǵy Elshisi R.Sýkma eliniń BUU Qaýipsizdik Keńesindegi turaqty emes músheliginiń basymdyqtary týraly málimdep, Indonezııanyń Qazaqstan úlgisin ustanyp, qol jetkizgen nátıjelerin odan ári kóbeıtýge umtylatynyn atap ótti.
Brıfıng aıasynda Qazaqstannyń BUU-daǵy, BUU Qaýipsizdik Keńesindegi jumysy týraly, sondaı-aq elimizdiń shıelenisterdi retteýge salǵan kúsh-jigeri, bitimgerlik mıssııalarǵa qatysýy jáne gýmanıtarlyq kómek kórsetýi týraly fotokórme uıymdastyrylyp, tarıhı beınematerıaldar kórsetildi.
