Konferensııada sóz alǵan D.Qojabekovtiń aıtýynsha, «Bilim-Innovasııa» lıseıleriniń (BIL) oqýshylary 2017 jyly oblystyq pándik olımpıadadan 271 altyn, 277 kúmis jáne 329 qola júlde ıelengen. Al 2018 jyly 265 altyn, 275 kúmis jáne 345 qola júldeni oqýshylary jeńip alǵan.
Sondaı-aq qor prezıdenti oqýshylaryn tek bilimge baýlyp qana qoımaı, salamatty ómir saltyn ustanýdy da esten shyǵarmaıtyndaryn aıtty. Tipti ártúrli jarystarda jeńimpaz atanǵan balalardy shetelge demalyp qaıtýyna joldama beredi eken. «Balalardy yntalandyrý úshin sporttan túrli saıystar uıymdastyramyz. Jaqynda ǵana shaǵyn fýtboldan týrnır ótkizdik. Endi jeńimpaz oqýshylar Anglııaǵa baryp jergilikti fýtbolmen tanysyp qaıtady», deıdi D.Qojabekov.
Jıynda qusbegilik ónerin álemge áıgili etken A.Nurǵaıypqyzy «Táýelsizdiktiń urpaqtary» atty Jastar jylynyń ashylý saltanatynda Elbasy Nursultan Nazarbaevpen kezdesýi jaıynda, alǵan áserimen bólisti. Sonymen qatar, 2019 jyldyń 9-15 qańtar aralyǵynda Almaty qalasyndaǵy respýblıkalyq fızıka-matematıka mektebinde ótken HV Halyqaralyq Jáýtikov olımpıadasynyń jeńimpazy Aıbek Myrzataev óz jetistikterimen bólisip, matematıka páninen jeńiske jetý qıyn bolǵanyn aıtty.
Al Sh.Qırabaeva BIL oqýshylary bıylǵy Halyqaralyq XV Jáýtikov olımpıadasynda 4 altyn, 11 kúmis jáne 19 qola, jalpy 34 medal jeńip alǵanyn aıtty.
