Elbasy tapsyrmasyna sáıkes, jýyrda Qaraǵandy qalasyndaǵy mańyzdy bilim oshaqtarynyń biri «Bolashaq» akademııasy atalǵan zań jobasyn talqylaýǵa arnalǵan dóńgelek ústel ótkizdi.
Jıynda bilim salasyna biregeı betburys ákeletin zań jobasy jan-jaqty saralanyp, qordalanǵan máseleler qoǵamnyń ádil talqysyna tústi. Basqosýda aıtylǵandaı, sońǵy jyldary bilim berý salasynda birqatar reforma jasalsa da, bilim berý úderisin uıymdastyrýda tek qurylymdyq ózgeristerdiń ǵana engizilýine baılanysty, bilim salasynyń tynysy tolyq ashylmaı keledi. Osy rette jańa zań jobasy bilim berý tájirıbesine engizilmegen máselelerdi tizbelep, jetilmegen tetikterge jan bitirýdi kózdeıdi. Elbasynyń arnaıy tapsyrmasymen muǵalim mártebesi jeke zań retinde óz aldyna bólek boı kóterýi ýaqyt talabynan týyndap otyr.
«Qazaqstan Respýblıkasyndaǵy pedagog mártebesiniń máseleleri men onyń bolashaqtaǵy damýy» taqyrybynda ótkizilgen dóńgelek ústeldi akademııa rektory Quralbaı Meńlibaev júrgizip otyrdy. Jıynǵa sonymen qatar «Bolashaq» akademııasynyń oqytýshy-professorlyq quramy, «Qazaqstandyq salalyq bilim jáne ǵylym qyzmetkerleriniń kásiptik odaǵynyń ókilderi qatysty.
– Jobanyń kóptegen baptary búginde oı-talqyǵa túsip jatyr. Bilim salasynda jyl saıyn júrgizilip jatqan reformalarmen qatar bilikti mamandardy daıarlaýdaǵy pedagogtardyń jaǵdaıyn túpkilikti jaqsartýdy maqsat tutatyn pedagog mártebesiniń qajettiligi shynymen artyp otyr. Atalǵan zań tujyrymdamasy osy turǵydan óte úlken mańyzǵa ıe, – dedi rektor Q.Meńlibaev. Dóńgelek ústelge kóterilgen eń ózekti másele – oblys kóleminde barlyq mektepti, bilim berý oshaqtaryn bilikti muǵalim mamandarmen qamtamasyz etetin óz aldyna jeke-dara Pedagogıkalyq joǵary oqý orny ashylý kerek degen oryndy oı boldy. Shynymen de oblys ortalyǵynyń joǵary oqý oryndarynda daıarlap jatqan zańgerler, hımıkter men bıologter, fızıkter men matematıkter áste pedagog mamandar emes, óz salasynyń ǵana mamandary bolyp tabylady. Qatysýshylar atap ótkendeı, bul másele Almaty, Shymkent, Pavlodar qalalarynda baıaǵyda sheshimin tapqan.
Jıynnyń basqa basqosýlardan taǵy bir ereksheligi – mańyzdy máslıhatta aıtylǵan salmaqty oılar men utymdy usynystar tolymdy jınaq bolyp jurtqa taratylýynda. Atalǵan oqý ordasynyń baspasynda qattalǵan júıeli jınaqqa 40 shaqty ǵalymnyń eki tilde eńbekteri engen. Keıde osyndaı quryltaılardyń qurǵaq áńgimemen aıaqtalmaı, is-shara sońynda ıgilikti iz qalǵany durys.
Aıta ketýimiz kerek, is-sharanyń uıymdastyrylyp ótilýine Parlament Májilisiniń depýtaty, Qazaqstan Respýblıkasynyń Ulttyq ǵylym akademııasynyń korrespondent-múshesi, zań ǵylymdarynyń doktory, professor Nurlan Dýlatbekov bastamashy bolǵan.
Mıras ASAN,
«Egemen Qazaqstan»
