Aýdan ótken jyly ekonomıka men áleýmettik salanyń basym baǵyttary boıynsha oń kórsetkishterge qol jetkizgen. Ekonomıkasynyń 94 prosenti aýyl sharýashylyǵyna tıesili bolsa, onyń 82,1 prosentin ósimdik sharýashylyǵy quraıdy. Bıyl et eksportyn 2,5 esege arttyrý týraly Elbasynyń tapsyrmasyn júzege asyrý maqsatynda aýdanda mal sharýashylyǵyn damytýǵa den qoıylýda. Máselen, Egindikól aýylynda jalpy somasy 420 mıllıon teńgege et óńdeý, 5 myń bas kúrketaýyq ósirý kesheniniń jáne mal soıý beketiniń qurylysy júrgizilmek. Al, Qorjynkól aýylynda 172 mıllıon teńgege 100 bas qazaqtyń aqbas etti iri qarasyn ósirý qolǵa alynyp, mal soıý jáne etti óńdeý sehy salynbaq. Atalǵan jobalardyń júzege asyrylýy qosymsha 40 jańa jumys ornynyń ashylýyna sebepshi bolmaq. Egindikól aýdany úshin búginde aýyz sý máselesi ótkir tur. Máselen, aýdanǵa aýyz sý uzyndyǵy 100 shaqyrym bolatyn Nura sý qubyry arqyly jetedi. 50 jyl buryn salynǵan sý qubyry jyl saıyn isten shyǵyp, turǵyndardyń aýyz sýsyz qalyp júrgen kúnderi az bolmaǵan. Endi bul másele, aldaǵy jyldary túbegeıli sheshilmek.
–Jarty ǵasyr buryn salynǵan sý qubyrynyń ábden tozyǵy jetken. Jamaýmen kúnimiz ótedi. Endi bul másele Úkimet qaýlysymen birjolata sheshiledi dep úmittenip otyrmyz. Iаǵnı, sý qubyry sharýashylyq júrgizý quqyǵyndaǵy memlekettik mekemeniń quzyryna berilmek. О́ıtkeni, jańa qubyrdyń salynýyna nemese bar qubyrdy kúrdeli jóndeýden ótkizýge shamamen 5 mıllıard teńge qajet. Al, bul somany oblystyq jáne aýdandyq bıýdjet kótere almaıdy. Endi atalǵan mekeme jobalyq-smetalyq qujat ázirleıdi. Sodan keıin baryp qubyrdy jóndeýge kirisedi. Sóıtip, aýdan turǵyndary bolashaqta táýlik boıy úzdiksiz aýyz sýmen qamtylady,–deıdi Egindikól aýdanynyń ákimi Erlan Isabekov.
Egindikól aýdany úshin mańyzdy máselelerdiń endi biri – jol qatynasy. Búginde aýdanda «Novocherkassk-Egindikól» baǵytyndaǵy avtojol jóndeýden ótkizilýde. 53 shaqyrymdyq joldyń 34 shaqyrymy jóndeldi, qalǵan joldy jóndeý bıyl jalǵastyrylmaq. Aýdandyq bıýdjetten kóktemgi tasqynnan zardap shegetin Egindikól-Abaı jolyn jóndeýge 8 mıllıon teńge qarastyrylǵan. Aýdan ortalyǵyndaǵy ishki joldardyń jóndelýine oblystyq bıýdjetten 20 mıllıon teńge bólinip otyr. Aýdan turǵyndary «Nurly jol» baǵdarlamasymen salynatyn «Ortalyq-Batys» jolynyń qurylysynan kóp úmit kútip otyr.
Baıqal BAIÁDIL,
«Egemen Qazaqstan»
Egindikól aýdany,
Aqmola oblysy
