Muzbalaq aqynnyń týǵan kúnine oraılastyryp ótken jyr keshine Almaty qalasyndaǵy joǵary oqý oryndarynyń stýdentteri qatysyp, «Muqaǵalı izimen» jáne «О́leńnen tógilgen ásem án» baǵyttary boıynsha óz ónerlerin ortaǵa saldy.
Jyr padıshasynyń týyndylary sondaı-aq, jastardyń júrekjardy shyǵarmalary oryndalǵan baıqaý Qyzdar ýnıversıtetiniń Tárbıe jáne áleýmettik jumystar jónindegi departamenti men «Aq qaýyrsyn» jas aqyndar klýbynyń muryndyq bolýymen uıymdastyryldy.
Ádebı saıysqa aqyn, Qazaqstan Jazýshylar Odaǵy basqarma tóraǵasynyń orynbasary Baqyt Bedelhanuly, Ǵ. Músirepov atyndaǵy akademııalyq balalar jáne jasóspirimder teatrynyń akteri Áset Imanǵalı, ánshi, kompozıtor, Qazaqstan Respýblıkasynyń eńbek sińirgen ártisi Marat Omarov, ánshi, kompozıtor Eralı Kósherbaev jáne aqyn Batyrhan Sársenhan qazylyq jasady.
Pedagogıkalyq oqý ornynyń qabyrǵasynda tuńǵysh ret ótip otyrǵan baıqaýǵa 30 jas aqyn men 30 ánshi qatysýǵa ótinish bildirgen. Onyń ishinde eki baǵyt boıynsha 20 ónerpaz iriktelip alyndy. Olardyń qatarynda ál-Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Qazaq ulttyq agrarlyq ýnıversıteti, Qazaq ulttyq qyzdar pedagogıkalyq ýnıversıteti men Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń stýdentteri bar. Qatysýshylar «О́leńnen tógilgen ásem án» jáne «Muqaǵalı izimen» baǵyttary boıynsha óz ónerlerin ortaǵa saldy. Saıyskerler birinshi baǵytta Maqataevtyń sózine jazylǵan ánderdi oryndasa, ekinshi baǵyt boıynsha qatysýshylar uly aqynnyń óleńderin naqyshyna keltire aıtyp, arnaý jyrlaryn oqydy.
Jıynda Tárbıe jáne áleýmettik jumystar jónindegi departamentiniń dırektory Jańagúl Sultanova sóz sóılep, muzbalaq jyr shaıyrynyń shyǵarmalaryn óskeleń urpaq arasynda keńinen nasıhattaý maqsatynda qolǵa alynǵan ıgilikti istiń aldaǵy ýaqytta dástúrge aınalatynyna senim bildirdi.
– Muqaǵalı – ǵumyrynyń sońyna deıin shyǵarmashylyqtan alystamaı, qolynan qalamy túspeı, qazaqtyń qara óleńiniń qudireti men syryna molynan qanyqqan aqyn. О́leń kıesiniń máni men maǵynasyna tereń boılap, sóz marjanyn kelisti kesteleı bilgen Maqataev muralary qazaq ádebıetine qosylǵan baǵa jetpes týyndylar. «Týady, týady áli naǵyz aqyn, Naǵyz aqyn bal men ý tamyzatyn. Jesirdiń aıyrylmas syrlasy bop, Jendettiń kózinen jas aǵyzatyn,» – dep jyrlaǵan Muqaǵalı ózi de qazaqtyń qara óleńiniń Hantáńirine aınalyp otyr, búginde. Jalyndaǵan jastardyń poezııaǵa degen qushtarlyǵyn arttyrý oraıyndaǵy taǵylymdy shara ómirsheń bolady dep oılaımyn, – dedi J. Sultanova.
Tartysty ótken baıqaý qorytyndysynda kil júıriktiń ishinen shyn júırikti anyqtaý ońaı bolǵan joq. Dese de «О́leńnen tógilgen ásem án» baǵyty boıynsha bas júlde Qyzdar ýnıversıtetiniń stýdenti Altynaı Jáńgirdiń qanjyǵasynda ketti. Birinshi orynǵa ál-Farabı atyndaǵy Qazaq ulttyq ýnıversıtetiniń stýdenti Edil Jetpisov ıe bolsa, ekinshi oryn Qazaq ulttyq ýnıversıtetiniń stýdenti Aıerke Saıranǵa buıyrdy. Al Qyzdar ýnıversıtetiniń stýdenti Arýjan Nasyrollanova úshinshi orynǵa qol jetkizdi.
«Muqaǵalı izimen» aqyndar jarysynda ál-Farabı atyndaǵy Qazaq ulttyq ýnıversıtetiniń stýdenti Shadııar Esenáliniń juldyzy janyp, jeńis tuǵyrynan kórindi. Osy baǵyt boıynsha birinshi orynǵa Qyzdar ýnıversıtetiniń stýdenti Laýra Jańabaı, ekinshi orynǵa Qazaq ulttyq ýnıversıtetiniń stýdenti Nurken Qumarbek jáne úshinshi orynǵa Abaı atyndaǵy Qazaq ulttyq pedagogıkalyq ýnıversıteti Oralbaı Myrzaqulov ıe boldy.
Júldegerler men jeńimpazdarǵa Qazaq ulttyq qyzdar pedagogıkalyq ýnıversıtetiniń rektory Gaýhar Aldambergenovanyń alǵys haty men dıplomy tabystalyp, baǵaly syılyqtar berildi.
