- Bolgarııada bes boksshymyzdyń fınalǵa deıin súrinbegeni jaqsy nátıje. Biraq aqtyq synda altynsyz qalǵanymyz azdap kóńil qynjyltady. Ulttyq qurama jigitterin birinshi ret úlken jarysqa bastap shyqtym. Endi qaı jerde kem-ketik baryn anyqtap, qaı olqylyqtyń ornyn toltyrý kerektigin saralaımyz.
49 kelidegi Temirtas Júsipovtiń úndilik boksshyǵa shamasy jetpedi. Moıyndaý kerek. Úndistandyq Amıt Azııa oıyndarynyń chempıony, tájirıbesi de, kúshi de kóp eken. Temirtas óte myqty boksshylardyń birinen utyldy.
60 kelidegi Zákir Safıýllınniń sharshy alańda kórgeni kóp. Fınalda Reseı boksshysymen judyryqtasty. Qarsylasy ózinen fızıkalyq jáne taktıkalyq turǵydan basym. Birinshi raýndta onyń kiltin taba almady, qalǵan kezeńderde Safıýllın bar kúshin salsa da, qarsylasyn ala almady.
64 kelidegi Samatáli Toltaevty jeńildi deýge aýzym barmaıdy. Menińshe, bizdiń bala soqqynyń myqtylyǵynan da, jıi shabýyldaý jaǵynan da alda boldy. Alaıda, tóreshilerdiń óz aıtary bar. Qazylar 3:2 esebimen jeńisti reseılik boksshyǵa berdi.
91 kelidegi Vasılıı Levıt pen reseılik Sadam Magomedov arasyndaǵy jekpe-jektiń tartysty ótkenine kúmán joq. Qarsylasy agressııaǵa jaqyn bolǵandyqtan, tóreshilerdiń kóńilinen shyqqan sııaqty. Basymen alǵa umtyla berdi de, Levıttiń bet-aýzyn jaraqattady. Tipti, bizdiń boksshynyń mańdaıy jarylyp ketipti. Vasılıı qarsylasyna jaqsy soqqy jumsady, biraq reseılik sportshy Levıttiń yńǵaıyna kelmedi. Júıkeni tozdyrǵan kezdesý dep osyny aıtý kerek shyǵar. Kóptegen tóreshiler jekpe-jekti baǵalaý kezinde agressııaǵa boı aldyratyn boksshylarǵa oń baǵa berip jatady. Al endi biri tehnıkasy joǵary, taza judyryqtasatyn sportshylardy alǵa qoıady. Bul jerde qazylardyń qyzmetin baǵalaý meniń mindetim emes.
69 kelidegi Abylaıhan Júsipov ýkraınalyq boksshymen ótken jartylaı fınaldyq kezdesýde jaraqat aldy. Birinshi raýndtan soń qolynyń aýyryp turǵanyn aıtty. Jarysty ári qaraı jalǵastyrmaı-aq, toqtataıyn dep oıladym. Alaıda, bir qolymen eki raýnd judyryqtasyp, jeńip ketti. Keıin dárigerler Júsipovtiń fınalǵa jaramaıtynyn aıtty. Búginde ol emdelýde.
56 kelidegi Qaırat Erálıev pen +91 kelidegi Qamshybek Qońqabaev sharshy alań ıelerinen utyldy. Olardy taza jeńildi dep aıtpaımyn, biraq jeńilistiń aty – jeńilis.
Bul bizdiń bıylǵy maýsymdaǵy birinshi týrnır. Jigitterdiń áýselesin biraz baıqadyq. Endi Azııa chempıonatyna daıyndalamyz, - deıdi Ǵalymbek Kenjebaev.
