Mádenıet jáne sport basqarmasy baspasóz qyzmetiniń habarlaýynsha, qysqy festıval bıyl 19-shy ret ótkizilip otyr. Festıval aıasynda ártúrli sporttyń shaǵyn-fýtbol, hokkeı, belbeý kúresi, gir sporty, armrestlıng, arqan tartý, motokross jáne shańǵy jarysy sııaqty túrlerinen jarystar ótti.
Qala turǵyndaryn sporttyq merekemen Mádenıet jáne sport basqarmasynyń basshysy Bolat Majaǵulov quttyqtady. Onyń aıtýyna qaraǵanda, bul is-shara elordalyq qysqy maýsymnyń bir bóligine aınalyp úlgergen.
«Bul is-shara Astana qalasynyń turǵyndary men qonaqtary úshin orasan paıda ákeledi. Jyl saıyn biz sportpen belsendi aınalysatyn jastar men balalar sanynyń ósip kele jatqanyn baıqaımyz. Aıta keterlik jaıt, kórermenderdiń sany jyl saıyn artyp keledi» dep atap ótti Bolat Majaǵulov.
Bul joly «Burqasyn-2019» festıvali 2000-ǵa jýyq áýesqoı sportshynyń basyn qosty. Is-sharaǵa mektep oqýshylary, orta jáne joǵary oqý oryndarynyń stýdentteri, kúshtik qurylymdar qyzmetkerleri, qala turǵyndary men qonaqtary qatysty.
Is-shara sońynda qatysýshylarǵa medaldar, dıplomdar, kýboktar men baǵaly syılyqtar tabystaldy. Qysqy festıvaldi Astana qalasynyń Mádenıet jáne sport basqarmasy men qalalyq ákimdiktiń Sorttyq-buqaralyq is-sharalardy ótkizý dıreksııasy uıymdastyrdy.