Is-shara departamenttiń Krımınaldy polısııa basqarmasynyń jetekshiligimen júrgizilse, is-sharanyń maqsaty - mal urlyǵyn jasaýǵa qatysy bar adamdardy anyqtaý, olardy ustaý jáne qylmystyq jaýapkershilikke tartý.
Is-sharanyń 3 kúninde 6 mal urlyǵy qylmysy tirkelip, sondaı-aq, buryn jasalǵan 7-i mal urlyǵy qylmysy ashyldy. Is-shara barysynda Jalaǵash aýdanynda 2018 jyldyń aıaǵynan jaıylym men qoradan mal urlyǵy qylmystaryn jasaǵan qylmystyq top quryqtaldy.
Mal urlyqtaryn jasap, ońaı paıda tabý maqsatynda olar túngi mezgilde baqtashysyz jaıylymda júrgen maldardy atys qarýymen atyp alyp, soıylǵan mal etterin oblys ortalyǵyndaǵy jeke kásipkerlerge arzan baǵamen satyp otyrǵan.
Jalpy, osy merzimde jábirlenýshi 4 azamattan aryzdar túsip, olardan 3 jylqy, 2 iri qara maly urlanǵany jáne olarǵa jalpy quny 1,5 mln teńge shamasyndaǵy shyǵyn keltirgeni anyqtaldy.
Jedel izdestirý sharalary barysynda quryqtalǵan 22-31 jas aralyǵyndaǵy 6 azamattyń Jalaǵash aýdanynyń turǵyndary ekeni anyqtalyp, olar óz qylmystaryn tolyǵymen moıyndaǵan.
Sonymen qatar olardyń turǵyn úılerine júrgizilgen tintý barysynda 12 jáne 16 kalıbrli tegis uńǵyly ańshy myltyqtary men mal etin tasymaldaǵan avtokólik tárkilendi.
Qylmyskerler mal urlyǵy qylmysynan bólek zańsyz qarý saqtaǵany úshin jaýapkershilikke tartylatyn bolady. Ustalǵandarǵa qatysty tergeý áreketteri júrgizilýde jáne olardyń basqa da qylmysqa qatystylyǵy tekserilýde.
