«Qazaqstan respýblıkasynda zeınetaqymen qamsyzdandyrý týraly» QR Zańyna engizilgen ózgeristerge baılanysty, mynadaı ózgerister kúshine endi:
– eger azamattyq-quqyqtyq sıpattaǵy sharttardyń bir taraby salyq agenti, ıaǵnı zańdy tulǵalar, jeke kásipkerler, jeke notarıýstar, jeke sot oryndaýshylary, advokattar, kásibı medıatorlar bolatyn bolsa, onda olar frılanserler úshin mindetti zeınetaqy jarnalaryn tóleıtin agentke aınalady. Bul rette jarnalar jeke tulǵanyń alatyn tabysynyń 10 paıyzy mólsherinde, biraq tıisti qarjy jylyna belgilengen eń tómengi jalaqynyń 10 paıyzynan kem emes jáne 50 eselengen mólsheriniń 10 paıyzynan joǵary emes mólsherde belgilenedi.
Bul rette jarnalardy esepteý úshin alynatyn eń joǵary jıyntyq jyldyq tabys respýblıkalyq bıýdjet týraly zańmen tıisti qarjy jylyna belgilengen eń tómengi jalaqynyń 50 eselengen mólsheriniń 12 eselengen somasynan aspaýy tıis.
Eger azamattyq-quqyqtyq sıpattaǵy sharttar salyq agenti bolyp tabylmaıtyn jeke tulǵalarmen jasalsa, onda frılanserler jarna tóleýge tek quqyly bolady. Biraq mindetti emes. Degenmen jeke tulǵa bul jarnalardy óziniń uıǵarýymen Qordaǵy jeke shotyna aýdara alady. Bul úshin ol jarnalardy bankter nemese Qazposhta arqyly «Azamattarǵa arnalǵan úkimet» Memlekettik korporasııasyna tóleıdi. Ári qaraı korporasııa jarnalardy Qorǵa aýdarady. Eger frılanser óziniń osy quqyǵyn paıdalansa, bul onyń jeke zeınetaqy kapıtalyn qalyptastyrýyna oń áser etetin bolady.
Sonymen qatar eńbek sharty boıynsha jumys isteıtin azamattar ári azamattyq-quqyqtyq sharttar boıynsha jeke tulǵalardyń tapsyrysyn oryndaıtyn bolsa, onda olar azamattyq-quqyqtyq sharttar boıynsha jarna tóleýden bosatylady. Bul jaǵdaıda mindetti zeınetaqy jarnalaryn salyq agenti bolyp tabylatyn jumys berýshi ǵana tóleıdi.
Aınash ESALI,
«Egemen Qazaqstan»
ALMATY
