Sherzod Pýlatov: Darhan minezge baı elde turamyz

Jalpy, alǵys aıtýda jaı ǵana sózben shektelip qalmaı, ony isimizben kórsete bi­lýimiz kerek. Iаǵnı, árbir jasalǵan jaq­sy­lyqqa jandy jylytatyn iltıpat sóz­dermen alǵysymyzdy bildirip, áreket etip otyrǵan abzal. 

Qazirgi tańda ár adam óziniń hal-qaderinshe shynaıy yqylaspen ıgilikti is jasap júr. Meniń baǵytym ǵylym men bi­lim salasy bolǵan soń, kóbine osy baǵytta bilimimdi shet memleketterde shyń­dap, tereńdetýdemin. Alǵan bilimimdi elimizde shaqyrylǵan aýdıtorııalarda dáris oqyp, tájirıbemmen bólisemin. Sonymen qatar ózimniń kitapqumarlyǵymnyń arqa­synda Qazaqstanda jaryqqa shyǵyp jat­qan ǵylymı eńbekterge, kitaptarǵa já­ne monografııalarǵa óz úlesimdi qosyp ke­le­min. Bıyl jyldar boıy qolǵa alyp júrgen birneshe eńbegimniń basyn qosyp, jaqsy bir týyndyny oqyrmannyń nazaryna usyn­baq­shymyn. 

Meniń shetelden oqyp kelip, Jambyl oblysy, Talas aýdanynyń Salyq komıtetinde zańger bolyp jumysqa orna­lasqan kezim – ómirimdegi áserli sát. Sol jerdegi jer­gilikti halyqtyń meni óte jyly qabyl­daǵa­ny sonshalyq, qarataýlyq dostarym páterde jalǵyz qaldyrmaı, óz úıle­rine alyp ketken bolatyn. Sóıtip men do­sym­nyń shańyraǵynda sol úıdiń balasyna aınalyp, bir-birimizben jaqyn baýyr bolyp ketken edik. Munymen meniń aıtpaǵym, qa­zaq halqynyń keń peıildi, darhan mi­nez­di qasıetteri meniń júregimdi baýrap alǵan-­dy. 

Osy kúnde Qazaqstanǵa jer aýdarylyp kelgen etnostar ózderin qushaq jaıa qarsy alǵan qazaq halqyna sheksiz alǵystaryn kóz jastarymen jetkizýde. Tarıhta bastan kesh­kenderin, ult retinde qazaq jerinde tu­raqtap, urpaq jalǵastyrǵandary týraly keıingi urpaqqa ónege, ósıet etip qaldyryp keledi.
Elbasy N.Á. Nazarbaev: «Qazaqstan hal­qy Assambleıasy qurylǵan kún – 1 naý­­ryzdy jyl saıyn barlyq etnostar bir-bi­rine alǵys aıtyp, meıirbandyq tanytyp, ol adamdardy óz týǵanyndaı qa­byl­da­ǵan qazaqtarǵa Alǵys aıtý kúni retin­de atap ótý ádiletti bolar edi. Ol kún bizdi bu­ryn­ǵy­dan da jaqyndastyra tús­pek. Bul kún meıi­rimdiliktiń, búkil qazaq­stan­dyq­tar­dyń bir-birine degen dostyǵy men mahab­baty­nyń jarqyn merekesi bola alar edi», – degen bolatyn. 

Bizdiń birlestikte halyq arasyndaǵy birlik pen jarasymdyqqa jáne jas urpaqqa úlgi beretin tárbıeli is-sharalarǵa kóptep mán beremiz. Bul Elbasynyń saıasatyn qol­­daýymyzdy bildiredi. Sonymen qatar qa­rııa­larymyz ben ardagerlerimizdi qurmet­tep, olarǵa sheksiz alǵysymyzdy is-áreke­ti­mizben bildiremiz. 

Sózimdi támamdaı kele, baýyrmal qazaq halqynyń qushaq ashqan keń júregine barsha etnostarmen birge ózimniń rızashylyǵymdy jetkizemin. Alǵys aıtý kúnin merekeleı otyryp, árbir kúnimizdegi alǵysty áre­ke­timiz arqyly jetkizip otyrsaq, bir ǵanıbet bolar edi.
Qazaq eline myń alǵys!

Sherzod PÝLATOV, 

Qazaqstan halqy Assambleıasy Ǵylymı-sarapshylyq keńesiniń múshesi, «Nur Otan» partııasynyń múshesi, Astana qalasy ózbek etnomádenı birlestiginiń tóraǵasy