Is-sharaǵa Prezıdent Ákimshiliginiń qyzmetkerleri, QHA-dan saılanǵan Parlament Májilisiniń depýtattary, etnomádenı birlestikterdiń ókilderi, «Jańǵyrý joly» jastar qozǵalysynyń belsendileri, qoǵam qaıratkerleri, elorda turǵyndary men qonaqtary qatysty.
Gúl qoıý sharasyna arnalǵan jıyndy Májilis tóraǵasynyń orynbasary Vladımır Bojko ashyp, bul kúnniń tarıhı jáne saıası mańyzyna toqtalyp ótti.
Al Astana qalasy ákiminiń orynbasary Nurlan Nurkenov merekelik sharaǵa jınalǵandardy aıtýly merekemen quttyqtady.
– Jer aýdarýdyń qorqynyshty jyldaryn bastan keshken jáne Qazaqstandy jańa Otan tutqan adamdarǵa qurmet retinde bul kún barlyq qazaqstandyqtardyń jadynda qalady. Sol kezde erkinen tys birneshe etnos ókilderi qazaq dalasyna jer aýdaryldy. Qazaq dalasy qanshalyqty keń bolsa, halyqtyń rýhy da sonshalyqty darhan. Jer aýdarylǵan halyqqa zor yqylas, kómek jáne qamqorlyq kórsetti. Qazaqstandy óz úıi sanaıtyn adamdardyń urpaǵy ósti. Úlkenderge óz etnosynyń dástúrlerin qoldaý jáne basqa halyqtardyń mádenıetin syılaǵany úshin alǵys aıtamyn, – dedi N.Nurkenov.
Merekelik shara kezinde, sondaı-aq Astana qalasy Koreı etnomádenı birlestigi tóraǵasynyń orynbasary Roza Pak qýǵyn-súrgin kezinde Qazaqstan aýmaǵyna jer aýdarylǵan túrli etnos ókilderine pana bolyp, meıirimdilik tanytqan qazaq halqyna rızashylyǵyn bildirdi.
– Búgin biz úshin tolǵanysqa toly kún. Biz gúl shoqtaryn qoıyp, sol jyldary kóptegen halyqty qushaq jaıa qarsy alǵany úshin qazaq jerine taǵy da alǵys aıtamyz. Meniń anam ótken jyly 100 jasqa toldy. Búgin ol qazaq halqynyń meıirimdiligi men kómegin, bizge jańa úı, Otandy tabýǵa qalaı kómekteskenin kúlimsirep, tereń qurmetpen eske alady. Biz órkendeý men múmkindikterge toly tatý elde ómir súrip jatqanymyzǵa zor rahmet aıtamyz, – dep Roza Pak óz áserimen bólisti.
Is-shara barysynda Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń belsendileri Alǵys aıtý kúnine arnap daıyndaǵan ádebı kompozısııasyn usyndy.
Jalpy, Alǵys aıtý kúnin merekeleý aıasynda elimizde 4 myńǵa tarta eldi mekende 1570-ke jýyq ártúrli mádenı-kópshilik jáne qaıyrymdylyq is-sharasyn ótkizý josparlanǵan. Olarǵa 1,4 mln-nan astam adam qatysady dep kútilýde.
Elimiz boıynsha «Qazaq eline myń alǵys!» monýmentteri Almaty, Batys Qazaqstan, Jambyl, Atyraý, Aqtóbe oblystary men Astana jáne Shymkent qalalarynda boı kótergen.
Altynaı QANATQYZY
