Birinshi kezekte – halyq múddesi

Qazaqstan Kásipodaqtar federasııasy atqarý komıtetiniń Elbasy Nursultan Nazarbaevtyń «Nur Otan» partııasynyń XVIII sezinde atap ótken bastamalaryn talqylaýǵa arnalǵan kezekten tys keńeıtilgen otyrysy ótti. QRKF tóraǵasy Baqytjan Ábdiraıymnyń tóraǵalyǵymen ótken otyrysqa QRKF, salalyq kásipodaqtar birles­tikteri men iri bastaýysh kásipodaq uıymdarynyń ókilderi qatysty. 

QRKF tóraǵasy kirispe sózinde qazaq­standyqtardyń naqty qajet­t­ilikterine, sonyń ishinde bıýdjet salasynyń tabysy tómen qyzmet­ker­leriniń qazirgi eńbekaqysy mól­sherin qaıta qarastyrý jáne ulǵaıtýǵa baǵyttalǵan Memleket basshysynyń bastamalaryn júzege asyrýda kásipodaqtardyń erekshe rólin atap ótti. B.Ábdiraıym búginde Federasııa quramynda mıllıonnan asa bıýdjet salasynyń qyzmetkerleri bar ekenin jáne kásipodaq uıymdary eńbekaqyny arttyrý qajettigi týraly máseleni júıeli túrde kóterip kele jatqan­yn jetkizdi. Bul rette kásipodaq qozǵalysynyń músheleri Elba­sy­nyń kóp balaly jumysshy analar men jalǵyz basty analardy áleý­mettik qoldaý bastamasyn erekshe iltıpatpen qabyldady, óıtkeni, bul bastamalar QRKF qyzmetiniń basym baǵyttarymen tikeleı úndesip jatyr. 

Qazirgi tańda Kásipodaqtar fede­rasııasynyń bastamasymen bas­taýysh kásipodaq uıymdarynda kóp ­balaly jumysshy analarǵa kómek kór­setilýde. Jumys berýshi­niń jo­ǵary áleýmettik jaýapker­shiligi men ká­sipodaqtardyń óz mindetterin ta­bys­ty atqarýynyń aıqyn dáleli retinde Qyzylorda oblysy «Jańaqorǵan» shıpajaıy­nyń tá­ji­rıbesin atap ótýge boldy. Atal­ǵan shıpajaıda osy jylǵy aq­pan­da kóp balaly jáne jalǵyz bas­ty analarǵa jyl saıyn eń tómengi jalaqynynyń eki eselengen mólsherin tóleý týraly sheshim qabyldandy. Sonymen qatar shıpajaıda jumys isteıtin áıelder árbir týǵan sábıi úshin eń tómengi jalaqy kóleminde bir jolǵy kómek ala­tyn bolady. Osyndaı mysaldar kásip­odaqtar tájirıbesinde az emes.  

Elbasynyń áleýmettik bastamalary Federasııanyń jastardy qoldaý, sondaı-aq aýyldarda áleýmettik salany damytý jáne jastardy aýyldyq eldi mekenderge tartý maqsatynda iske asyryp jatqan naqty sharalarymen sáı­kesedi. Osylaısha, Jastar jyly aıasynda «Senim» salalyq kásip­odaǵy aýylda jumys isteýge nıetti densaýlyq saqtaý salasynyń jas mamandaryna jyl saıyn 500 myń teńge kóleminde 60 grant bólý týraly sheshim qabyldady. 

Otyrys barysynda QRKF eńbek­kerlerge áleýmettik kómek kórsetý sharalaryn ári qaraı da arttyrý maqsatynda elimizdiń kásipodaqtary men jumys berýshilerge Prezıdent bastamalaryn qoldaý týraly Úndeý joldady. 

«Eńbek adamynyń quqyǵy men múddesin qorǵaý salasyndaǵy eń iri qoǵamdyq uıym retinde Kásipodaqtar federasııasy azamattyq qoǵamnyń barlyq jasampaz kúshterin, barlyq áleýmettik áriptesterdi adam kapıtalyn jan-jaqty jáne sapaly damytý, eńbekkerlerdiń ómir súrý sapasyn arttyrý, ekonomıkalyq jáne áleýmettik qorǵaý jolynda birlese, kúsh-jiger jumyldyrýǵa shaqyrady.

Biz áleýmettik áriptesterge, ju­mys berýshilerge, kásipodaq uıym­­daryna ujymdyq shartqa jumys­shy áıelderdi, sonyń ishinde kóp­ balaly jáne jalǵyz basty analar, múmkindigi shekteýli balalary bar analardy qoldaý jóninde to­lyq­tyrýlar engizý arqyly qoǵam, eńbek ujymy aldynda áleýmettik jaýap­kershilik ala otyryp, Pre­zıdenttiń áleýmettik bastamalaryn qoldaý jóninde úndeý tastaımyz. Bul, óz kezeginde, qoǵamnyń ál-aýqatynyń jáne elimizdegi turaqtylyqtyń negizi bolady», dep kórsetilgen QRKF Úndeýinde.

Otyrysqa qatysýshylar oryn alyp jatqan ózgerister eńbek­kerlerdiń jan-jaqty qoldaýyna ıe bolatynyna jáne qoıylǵan maq­sattar sátti júzege asyrylatynyna zor senim bildirdi.

Joldybaı BAZAR,
«Egemen Qazaqstan»