Qyzyl kilem, sáni men saltanaty kelisken bezendirý, ásem kıingen telemamandardyń shat-shadyman kóńil kúıi bir sátke «Qazmedıa» ortalyǵyn jýrnalısterdiń tól dýmany, kásibı merekesine aınaldyryp jibergendeı áser syılady. «Qazmedıa holda» ótken saltanatty keshke Aqparat jáne qoǵamdyq damý mınıstri Dáýren Abaev, memleket jáne qoǵam qaıratkerleri, qazaq televızııasynyń ardagerleri men jýrnalıster, estrada ánshileri qatysty.
2017 jyldan beri jyl saıyn qazaq televızııasy úzdikterin anyqtap, telejýrnalısterdiń kásibı dárejesin kóterýge arnalǵan «Tumar» syılyǵy bıyl 9 nomınasııa boıynsha júzden júırik shyqqan myqtylarǵa buıyrdy. Saraptaý alqasyna kelip túsken barlyǵy 302 ótinimniń ishinen sýyrylyp shyǵyp, «Úzdik teleserıal», «Úzdik áleýmettik joba», «Úzdik derekti fılm», «Úzdik aqparattyq-saraptamalyq baǵdarlama», «Televızııalyq maýsymnyń úzdik oqıǵasy», «Úzdik oıyn-saýyq joba», «Úzdik aımaqtyq telejoba», sondaı-aq «Úzdik telejýrnalıst» jáne «Úzdik telejúrgizýshi» atalymynda top jarǵan úzdikter keýdesine «Tumar» taǵyp, oljaly tarqasty.
Sonymen báıge qorytyndysy boıynsha «Úzdik aımaqtyq telejoba» atalymynda Soltústik Qazaqstan oblystyq «Qyzyljar» telearnasynyń «Welcome to Qyzyljar» baǵdarlamasy marapattalsa, «Úzdik áleýmettik baǵdarlama» «Astana» telearnasynyń «Dom mamy» jobasyna buıyrdy. NTK arnasynyń «Qara beri» baǵdarlamasy «Úzdik oıyn-saýyq joba» atalymyndaǵy baǵdarlamalardyń kóshin bastap, KTK telearnasy alamanǵa qosqan «Krasnyı pýlt» jobasy «Úzdik teleserıal» atandy. Al «Habar-24» arnasy «Úzdik aqparattyq-saraptamalyq baǵdarlama» atalymynda top jardy. Sonymen qatar Prezıdenttiń teleradıo kesheni usynǵan «Uly dala elordasy» jobasy «Úzdik derekti fılm», «Gákký» arnasynyń «Gákký daýysy» baǵdarlamasy «Televızııalyq maýsymnyń úzdik oqıǵasy» atalymynda júldeger atandy. Belgili ǵalym Namazaly Omashev tabys etken «Úzdik telejúrgizýshi» syılyǵyna «31 arna» «Informbıýro» baǵdarlamasynyń dıktory Aıda Boranbaeva laıyq dep tanylsa, «Qazaqstan» ulttyq telearnasy Aqparattyq baǵdarlamalar dıreksııasynyń jýrnalısi Ǵabıt Bókenbaı «Úzdik telejýrnalıst» atandy. Al «Tumar» ulttyq televızııalyq báıgesiniń basty júldesi – «Tumar» arnaıy syılyǵy «Qazaqstan» teleradıo korporasııasynyń «Jýsan» jobasy ıelendi. Marapatty tabys etken Aqparat jáne qoǵamdyq damý mınıstri Dáýren Abaev baıqaýda top jaryp, «Tumar» taǵynǵan barsha telejýrnalısterdi quttyqtaı kele, osyndaı aýqymdy da mazmundy jobalardy júzege asyrýǵa uıytqy bolyp, únemi qoldaý bildirip kelgen elimizdiń Tuńǵysh Prezıdenti Nursultan Ábishuly Nazarbaevqa zor alǵysyn bildirdi.
Sóıtip, telejuldyzdar óńirine «Tumar» taǵyp, kásibı mereıin ósirgen mazmundy kesh sońy kúıshi, dombyrashy, dástúrli jáne estrada ánshileriniń tamasha óner kórsetýine ulasyp, jeńimpazdarǵa estelik kýbok tabys etildi.
Nazerke JUMABAI,
«Egemen Qazaqstan»
