Biz tarıhı oqıǵanyń kýási boldyq. Elbasy óziniń prezıdenttik ókilettigin toqtatty. Sóıtip Konstıtýsııaǵa sáıkes Qazaqstan Respýblıkasy Prezıdentiniń ókilettigin atqarý Senat tóraǵasyna kóshetini týraly Jarlyqqa qol qoıdy. Árıne, bul jurttyń kóbine kezdeısoq oqıǵa boldy dep oılaımyn. Biraq shyntýaıtynda tarıhı oqıǵa. Nursultan Nazarbaev Qazaqstanǵa kóp eńbek sińirdi. Anyǵyn aıtqanda, Uly dalada eldi talaı adamdar basqardy. Olardyń arasynda uly handar da, bıler de, nebir batyrlar da boldy. Solar Uly dalany qorǵaý úshin bastaryn báıgege tikti. Biraq amal neshik, olardyń biri de, tipti Abylaı han da táýelsizdikke qol jetkize almady. Máselen, Muhtar Áýezov sekildi, Qanysh Sátbaev sekildi bizdiń ustazdarymyz, aǵalarymyz táýelsizdikti kóre alǵan joq. Táýelsizdikti biz kórdik. Táýelsizdikke biz jettik. Nursultan Nazarbaev jetti. Ol óziniń halqymen birge, elimen birge jetti.
Árıne, bastapqyda Qazaqstan aty bar da, zaty joq, Keńes Odaǵy tarqaǵannan keıin qańyrap bos qalǵan, qıraǵan memleket edi. Sol qulandydan, qırandydan myqty táýelsiz memleket ornatý úshin júrek kerek edi. Nursultan Nazarbaev táýekelge bardy. Sol kezde jurt jalaqy, zeınetaqy ala almaı júrgen yzy-qıqy zaman bolatyn. Zaýyttardyń bári toqtaǵan edi. Sondaı qıynshylyqtardy eńsere otyryp, Elbasy ekonomıkasy zor memleket turǵyzdy. Ony odan ári damytty. Álemge tanytty. Qazaqstan álemdegi ozyq elý eldiń qataryna qosyldy. Bul, árıne, aıtýǵa ǵana jeńil.
Men táýelsizdiktiń aldynda, eleń-alańda, sosyn táýelsizdikten keıingi jyldarda, ıaǵnı eń aýyr jyldarda sol kisiniń janynda boldym. Sol kezdegi bar aýyrtpalyqtardy kózimmen kórdim. Nurekenniń uıqysyz túnderiniń, kúlkisiz kúnderiniń kýási boldym. Tóńirektiń bári kóz tigip otyrdy. Biraq sol qıynshylyqtarǵa qaımyqpady. Memleket isin oıdaǵydaı uıymdastyra bildi. Dáleldedi. Uly dalada shyn máninde táýelsiz memleket ornatty. Búginde Qazaqstan álem moıyndaǵan, eseptesetin, sanasatyn memleketke aınaldy.
Alǵashqy qolyna bılik tıgen kezden bastap Nurekeń ıadrolyq polıgondy japty. 1991 jyly jeltoqsanda Prezıdent saılaýy boldy. Saılanǵannan keıin 16 jeltoqsanda táýelsizdik aldyq. Sol táýelsizdikti alǵannan keıin birden, Nurekeń meni shaqyryp, qolymyzǵa óz bıligimiz tıdi, endi Dúnıe júzi qazaqtarynyń quryltaıyn ótkizeıik dedi. Sonda baıqasańyz, qazynanyń túbi tesik edi. Alaıda, biz sol kezde Qazaqtyń tuńǵysh quryltaıyn ótkizdik. Sodan beri talaı quryltaı ótti ǵoı, biraq alǵashqy quryltaıǵa biri jetpeıdi. Ol quryltaı eldiń aýzynda ańyz bolyp qaldy.
Biz qala salǵandy kórgen joqpyz. Zaýyt salǵandy, úı salǵandy bilemiz. Al endi úlken qala salǵandy da kórdik. Elbasy Astanany Aqmolaǵa kóshirdi. Jasyryp, jabatyny joq, ol kezde men de bul sheshimge qarsy boldym. Eldiń jaǵdaıy nashar, nege kerek dedim. Sonda bul kisi bolashaqty naqty boljaǵan eken. Bárin aldyn ala bilipti. Táýbe. Astanany kóshirdi. Buǵan júrek, úlken aqyl kerek edi. Alda uly ister kútip turdy. Bárin eńserdi. Adam tańǵalatyn, isterdi júzege asyrdy. Endi bul qala Eýrazııanyń astanasyna aınalyp barady.
Latyn álipbıine kóshtik. Búkil túrki dúnıesiniń rýhanı astanasy – Túrkistanǵa Ońtústik Qazaqstan oblysynyń ortalyǵyn kóshirdi. Sóıtip bárimizdiń kókeıimizde júrgen armanymyzdy júzege asyrdy. Sońǵy kezderi rýhanııatqa erekshe mán bere bastady. Olar: «Rýhanı jańǵyrý», «Uly dalanyń jeti qyry» sekildi maqalalar. Endi óziniń ornyna tańdaǵan adamy ábden laıyqty dep esepteımin. Qasym-Jomart Toqaev aqyldy, bilgir, tájirıbeli dıplomat adam. Munyń bárin men óte durys dep esepteımin.
Myrzataı JOLDASBEKOV
