Eń aldymen aıryqsha atap aıtatyn bir másele – Tuńǵysh Prezıdentimiz Nursultan Nazarbaevtyń keshegi mańyzdy málimdemesi egemen elimizdegi dástúrli demokratııanyń jarqyn kórinisin aıqyn kórsetip berdi. Men Elbasymyzdy kóp jyldardan beri janyma jaqyn jan retinde jaqsy bilemin. Alǵash ret Qaraǵandy oblysynda qyzmet atqaryp júrgende kezdesken tanystyǵymyz búginge deıin úlken syılastyqqa ulasty deýge bolady. О́ziniń shetelderge barǵan birqatar saparyna serik etken tusta ol kisiniń tarıh aldyndaǵy, halyq aldyndaǵy eńbeginiń óte úlken ekenine kózim anyq jetken kezder kóp.
Keshegi málimdemeni tyńdap otyrǵanda kókiregimizde qımastyq sezimi ornaǵanyn jasyra almaımyz. Meniń jeke shyǵarmashylyǵymdy baǵalap birneshe ret qabyldaǵan Memleket basshysy qazaq ádebıeti men mádenıetine óte qamqor boldy. Qıraǵan keńes ókimetiniń úıindisiniń ústine táýelsiz memleket ornatý – almaǵaıyp alasapyran kezeńde ońaı soqpaǵany anyq. Sol tar kezeńde ár aqyn-jazýshynyń, qalamdastardyń qamyn oılap Prezıdent stıpendııasyn taǵaıyndady. Mundaı qamqorlyq bizben odaqtas, kórshiles elderdiń eshqaısysynda bolǵan joq. Qysyltaıań kezeńniń ózinde ulttyń rýhanııatyna ustyn bolarlyq «Babalar sóziniń» 100 tomyn jaryqqa shyǵaryp, «Mádenı mura» atty mazmuny baı birtutas baǵdarlama qabyldady. Ol sharapatty sharýany biz eshqashan umytpaýymyz kerek. Elbasynyń eń birinshi erligi – el jalaqy ala almaı jantalasyp jatqan óliara shaqta halyqty jyly keńsede otyryp basqarmaı, shahtaǵa ózi túsip, sharýany tikeleı sheshýge tyrysqandyǵy bolatyn. Eline etene jaqyn Prezıdentimiz qıyndyqty árdaıym birlik kúshi arqyly jeńemiz degen sózinde turyp, Qazaq elin qanshalyq bıikke kóterip shyǵarǵanyn ýaqyt tarazysy áli de ádil talǵamdaıtyn bolady. Men Nursultan Nazarbaevtyń kemeńger kóshbasshy ekendigin ár kezde ardaqtap aıtyp kele jatqan azamat retinde ol kisi jaıly jazylǵan úsh kitabymdy aıta alamyn. Alǵash qalam terbegen «Kemeńgerlik qupııasy» eńbegim bolsa, odan keıin taǵy eki kitap «Qas-qaǵym jáne máńgilik», «Inemen qazylǵan qudyq» atty eńbekterim Elbasynyń tutas kelbetin jan-jaqty ashýǵa arnalǵan eńbekter boldy.
Bir sózben aıtqanda, Elbasymyzdyń keshegi málimdemesi – azamattyq erik-jigerdiń kúshi, saıası-tulǵalyq erliktiń kórinisi. Árıne qımaımyz, kóshbasshyń túgili kóship bara jatqan kórshińdi qımaıtyn et júregińe erekshe jaqyn etene sezimder bolady. Sol sezimder – el erteńiniń úmitti bolashaǵyna degen senimmen ushtasa bermek.
Sábıt DOSANOV,
jazýshy, Memlekettik syılyqtyń laýreaty
