Bul júıe azamattarǵa birden tórt túrli tólem tóleý múmkindigin berdi. Atap aıtar bolsaq, BJT arqyly salyq tóleýshiler memlekettik kirister organyna tólenetin jeke tabys salyǵyn, BJZQ-ǵa tólenetin mindetti zeınetaqy jarnalaryn, memlekettik áleýmettik saqtandyrý qoryna tólenetin áleýmettik aýdarymdy sondaı-aq mindetti áleýmettik medısınalyq saqtandyrý qorynyń áleýmettik jarnalaryn aýdara alady.
BJZQ Astana qalalyq bólimshesiniń dırektory -basqarýshy dırektor Murat Sharıpov zeınetaqy júıesin jańǵyrtýdaǵy basty maqsat – zeınetaqy tólemderiniń tıimdiligin arttyrýǵa basymdyq bergenin aııtty.
«Azamattyq-quqyqtyq sıpattaǵy sharttardyń bir taraby salyq agenti bolsa, olar jeke tulǵalarǵa, onyń ishinde frılanserlerge beriletin tabystan mindetti zeınetaqy jarnasyn tóleıdi. Eger azamattyq-quqyqtyq sıpattaǵy shart jeke tulǵamen jasalǵan bolsa, mindetti zeınetaqy jarnasyn tóleý – frılanserdiń mindeti emes, quqyǵy bolyp sanalady. Bul rette jarnalardy esepteý úshin alynatyn eń joǵary jıyntyq jyldyq tabys respýblıkalyq bıýdjet týraly zańmen tıisti qarjy jylyna belgilengen eń tómengi jalaqynyń 50 eselengen mólsheriniń 12 eselengen somasynan aspaýǵa tıis», – dedi Murat Sharıpov.
2019 jyldyń 8 qańtarynan bastap jeke tulǵaǵa mindetti zeınetaqy jarnasy boıynsha shot ashý úshin qorǵa júginýdiń qajeti joq. Jeke tulǵanyń qorda mindetti zeınetaqy jarnasy boıynsha ashylǵan shoty joq bolsa, onda alǵashqy jarna túsken kezde shot ózdiginen rásimdeledi eken.
2019 jyldyń 25 qańtarynan bastap jeke zeınetaqy shotynyń jaı-kúıi týraly aqparat elektrondy úkimet portaly arqyly alý tártibi jeńildetilipti.
Salymshylar (alýshy) jeke zeınetaqy shotynan úzindi kóshirmeni tek elektrondyq sıfrlyq qoltańbamen ǵana emes, bir rettik sms-paroldiń kómegimen de alyp júr. Bul úshin salymshy (alýshy) elektrondyq úkimet portalynyń jeke kabınetinde tirkelip, úzindi kóshirme alýǵa saýal joldap, mGov mobıldik azamattar bazasynda tirkelgen salymshynyń (alýshynyń) uıaly telefonyna bir rettik sms-parol jiberiledi.
«Másele osylaısha ońaı ári jyldam sheshiledi», – dedi Murat Sharıpov.
Gúlbarshyn SABAEVA,
«Egemen Qazaqstan»
ALMATY
