Premer-Mınıstr qalanyń Tuńǵysh Prezıdent – Elbasynyń qurmetine oraı qaıta atalýy aıtýly tarıhı oqıǵa bolyp tabylatynyn atap kórsetti.
«Qazirgi tańda bizdiń kóz aldymyzda táýelsiz Qazaqstannyń tarıhı jylnamasynyń jańa betteri jazylýda. Sondyqtan memleketimizdiń jáne onyń jańa elordasynyń negizin qalaýshy, Uly dalanyń tórinde damyǵan memleket qurǵan Elbasymyz Nursultan Ábishuly Nazarbaevtyń uly tulǵasyn osylaı tarıhı túrde dáripteý – bul bizdiń keleshek óskeleń urpaq aldyndaǵy paryzymyz», dedi Asqar Mamın.
Onyń aıtýynsha Nur-Sultan qalasy Elbasy N. Nazarbaevtyń jańa ekonomıkalyq modeliniń negizgi qozǵaýshy kúshine aınaldy.
«Jańa astanamyzdyń qalyptasýynyń alǵashqy jyldarynda Elbasymyzdyń «Astananyń gúldenýi – Qazaqstannyń gúldenýi» baǵdarlamasy astananyń ǵana emes, elimizdiń barlyq óńirleriniń damýyna qýatty serpin berdi. Álemdik arenada Qazaqstannyń yqpaly men róli jyl ótken saıyn artyp keledi. Bul – sózsiz bizdiń Elbasymyzdyń eren eńbegi. Astananyń Tuńǵysh Prezıdent esimimen atalýy – ádiletti ári der kezinde jasalǵan sheshim. Jańa ataýǵa ıe bolǵan astananyń aldynda budan da bıik, uly maqsattar tur. Sonymen qatar, bul – jańa múmkindikter ári úlken jaýapkershilik», — dedi Premer-Mınıstr. Ol "biz bárimiz de astanalyqtar bolyp qalamyz, óıtkeni, Nur-Sultan – Qazaqstannyń Astanasy!" ekenin atap ótti.
Esterińizge sala keteıik, búgin Memleket basshysy Qasym-Jomart Toqaev Qazaqstan Respýblıkasynyń astanasy – Astana qalasyn Qazaqstan Respýblıkasynyń astanasy – Nur-Sultan qalasy dep qaıta ataý týraly Jarlyqqa qol qoıdy.
