Azamattardyń mańdaı terimen tapqan aqshalaryna kelisti etip jasatqan «Báıterek» aýylǵa sán berip turatyn. Qazaq eliniń sımvolyna aınalǵan bul «Báıterek» mańaıynan ótkender oǵan súıispenshilikpen qyzyǵa qaraıtyn.
Byltyr osy «Báıterek» ornynan alynyp tastaldy. Sol orynǵa taǵy da aýyldan shyqqan kásipkerler óz qarajatymen «Baq qusy» monýmentin ornatty. Aýdan ákimi Dosmahanbet Álıevtiń ózi qatysyp, sóz sóılep, lentasyn qıdy. Jańashyldyqqa qumar halyqpyz ǵoı. Buǵan da kózimiz úırendi.
Al burynǵy «Báıterek» aýyldyq mádenıet úıiniń aldyna turǵyzylatynyn estigen jurt qatty qýandy. Kópshilik jıi keletin orynǵa qoıylatyn bolǵan soń aýyl azamattary da razy bolyp edik. Alaıda, ornynan alynǵan «Báıterekti» kereksiz dúnıedeı kólikke artyp, kózden tasalaý jerge aýdara salǵan. Temirleriniń biraz jerleri maıysqan. Azdap jóndeýden ótkizse burynǵy qalpyna keltirýge bolady.
Elimizdiń sımvolyna aınalǵan «Báıterekti» qalpyna keltirip, turǵyzý jóninde aýyl okrýginiń ákimi Asqar Qýanyshqa aıtylǵanymen, ol bul sharýany qolǵa almady. Mine, osylaısha tasada qalǵan «Báıterek» qashanǵa deıin jatary belgisiz.
Kezinde mektep bitirip ketken túlekterdiń aýyzbirshiligimen, mańdaı terimen tapqan adal aqshalaryna turǵyzǵan, aýylǵa sán bergen, eldiń maqtanyshyna aınalǵan «Báıterektiń» qulaǵany kópshiliktiń kóńiline qaıaý túsirgeni jasyryn emes. Sol iske atsalysqan azamattardyń arasynda búginde Allanyń jazýymen o dúnıelik bolǵandar da bar. Artynda qalǵan ata-anasy, baýyrlary sol balalarynyń qolynan shyqqan «báıteregin» izdeýde. Osy máselege kelgende ákimshiliktiń kóz juma qaraýy kóńilge qaıaý túsiredi. Búginde el arasynda «Muny soqqandardyń ózderi buzyp áketkeli jatyr. Qaıtsin? Temirin satyp, baqılyq bolǵandarǵa Quran baǵyshtatýdan basqa amaldary qalmapty» degen sóz jeldeı esýde.
Osylaısha qolda bardyń qadirine jete almaı otyrǵan jaıymyz bar.
Sáben QOIShYBAI
Jambyl oblysy
Talas aýdany,
Aqkól aýyly
