«Qaıtys bolǵan jandardyń týǵan-týystaryna ákimdik atynan jáne óz atymnan qaıǵyra kóńil aıtamyn. Búgingi JKO-sy saldarynan eki adam qaıtys bolyp, 36 adam túrli jaraqat alǵan. Qazir olar medısınalyq kómek alýda», - dedi Baqyt Sultanov ákimdikte ótken jınalysta.
Osy oraıda ákim búgingi jol kólik oqıǵasynan qaıtys bolǵandardyń otbasyna, zardap shekkenderge jan-jaqty kómek kórsetýdi jáne JKO-nyń sebebin anyqtaýdy tapsyrdy.
Sonymen qatar, qalalyq qoǵamdyq densaýlyq saqtaý basqarma basshysy Qamaljan Nadyrovtyń aıtýynsha, oqıǵa ornynda jedel járdemniń 19 brıgadasy jumys jasaýda.
Barlyǵy 36 adam zardap shekken, eki adam qaıtys bolyp, 23 adam aýrýhanaǵa jatqyzylǵan. 17 adam ambýlatorlyq em alýda. Qazir úsh adamǵa operasııa jasalýda, taǵy tórt adam daıyndalýda. Olardyń qatarynda 1983 jyly týǵan Fılıpın eliniń azamaty bar, onyń jaǵdaıy aýyr. Aldyn ala dıagnozy: «Keýde qýysy jaraqattanǵan jáne jambasy synǵan». Zardap shegýshilermen psıhologtar jumys isteýde», – dedi Q. Nadyrov.
JKO-na jedel járdem kóligi de túsken. Onyń ishinde eki feldsher men júrgizýshi bolǵan. Júrgizýshi din aman. Al bir feldsher tize jaraqatymen birinshi qalalyq aýrýhanaǵa jetkizilgen.
Osyǵan deıin habarlanǵanymyzdaı, búgin Uly dala kóshesi men Qabanbaı batyr dańǵyly qıylysynda úsh avtobýs jáne jeńil kólikterdiń qatysýymen jol kólik oqıǵasy oryn alǵan. Qala mańyna qatynaıtyn № 303 marshrýt avtobýsy № 12 baǵdar avtobýsymen soqtyǵysqan bolatyn.
