Qyzdar ýnıversıtetiniń Tárbıe jáne áleýmettik jumystar jónindegi departamenti muryndyq bolǵan baıqaýǵa 7 boıjetken baptary men baqtaryn synady. Shara uıymdastyrýshylarynyń aıtýynsha, saıysqa qatysýǵa oqý ornynyń 6 fakýltetinen barlyǵy 71 úmitker ótinish bildirgen. Aldyn-ala irikteý boıynsha jartylaı fınalǵa 15 qyz ótse, aqtyq kezeńge qatysýǵa 7 boıjetken múmkindik alǵan.
Baıqaýǵa daıyndyq barysynda boıjetkender túrli mádenı baǵdarlamalarǵa qatysyp, sán agenttikterinde óz sheberlikterin arttyrǵan. Sondaı-aq qazaq halqynyń tarıhy, salt-dástúri baǵytyndaǵy tyń derektermen tanysyp, bilimderi men biliktiligin arttyrýǵa arnalǵan arnaıy sharalarǵa atsalysty.
– Saıysta qyzdar ózderin tanystyryp, óresiniń bıiktigin tanytýǵa umtyldy. Artynsha shyǵarmashylyq sheberlikterin synatty. Árkimniń qabileti ártúrli. Tańdaǵan salalary da ár alýan. Dese de shama-sharqynsha óz ónerlerin pash etti. Jarysta oı ushqyrlyǵy synalyp, bilim deńgeıleri tekserildi. Qyzdarǵa qoıylǵan saýaldarǵa jan-jaqty, dálirek aıtqanda saýatty jaýap berý talap etildi. Sánqoılyq synaqqa da óris ashyldy. Bul kezeńde otandyq dızaınerlerdiń qolynan shyqqan sándi kóılek úlgileri kópshilik nazaryna usynyldy. Syrtqy symbat synalyp, sahnadaǵy júris-turysqa da mán beriletin týr osy, – deıdi Tárbıe jáne áleýmettik jumystar jónindegi departamentiniń dırektory Jańagúl Sultanova.
Baıqaýǵa qatysýshylarǵa belgili mádenıet jáne óner maıtalmandary, úkimettik emes uıym ókilderiniń jetekshileri qazylyq jasady. Olardyń qatarynda Qazaqstannyń Mádenıet qaıratkeri Baný Turǵynbaeva, teatr jáne kıno aktrısasy Aıda Jantileýova, «Monro» modeldik agenttiginiń dırektory Mádı Erseıit, ánshi, akrtısa Láılá Temirhan syndy azamattar bar.
Jınaǵan upaı qorytyndysy boıynsha О́ner jáne mádenıet fakýltetiniń stýdenti Móldir Qazıeva bas júldege ıe boldy.
Birinshi orynǵa Áleýmettik-gýmanıtarlyq fakýltetiniń stýdenti Laýra Ysqaqova laıyq dep tanylsa, ekinshi oryn Jaratylystaný fakýltetiniń stýdenti Symbat Abdýǵappar men Pedagogıka jáne psıhologııa fakýltetiniń stýdenti Aıajan Aqtymbaıdyń qanjyǵasynda ketti. Al úshinshi oryn Jaratylystaný fakýltetiniń stýdenti Ásem Qalmahanǵa buıyrdy.
Sonymen qatar «Alǵyr arý» nomınasııasymen Pedagogıka jáne psıhologııa fakýltetiniń stýdenti Uljalǵas Nasır, «Zerdeli arý» nomınsııasymen О́ner jáne mádenıet fakýltetiniń stýdenti Ulmeken Shekerbek, «Kórermen kózaıymy» nomınasııasymen Pedagogıka jáne psıhologııa fakýltetiniń stýdenti Aıajan Aqtymbaı marapattaldy.
– Sulýlar saıysyna qatysýshylardyń barlyǵy da úlken daıyndyqpen kelgendigi kórinip tur. Bári de bas júldeden úmitti edi. Shetinen sulý, ónerli. Qazylar alqasy shyn myqtyny anyqtaý maqsatynda árbir úmitkerdi jan-jaqty taldap baryp, naqty sheshim qabyldady, – deıdi shara uıymdastyrýshylary.
Aınash ESALI,
«Egemen Qazaqstan»
ALMATY
