Bul kún – rýhanı izgi qasıetterdi, ulttyq qundylyqtardy ulyqtap teatr tóńireginde eńbek etip júrgen shyǵarmashylyq shabytty jandar úshin erekshe kún. Sebebi qazaq teatry da álem teatrlarynyń bólinbes bólshegi. Qazaqstandaǵy 40-qa jýyq teatrdyń basyn biriktirip 2016 jyly qurylǵan Qazaqstan teatrlary assosıasııasy búgingi sahna ónerindegi ózekti máselelerdiń sheshimin tabýǵa atsalysyp, teatrlar arasynda baılanys ornatyp otyrǵan biregeı birlestik. Shetel teatr uıymdarymen korporatıvtik baılanystardy nyǵaıta túsý, teatr qyzmetiniń kórkemdik-estetıkalyq, zııatkerlik áleýeti men múmkindikterin arttyrý, jastardyń kásibı shyńdalýyna múmkindikter jasaý, teatrlar ujymyndaǵy shyǵarmashylyq izdenis monıtorıngin qalyptastyrý, jańa esimderdi anyqtaý, jastardyń aǵa tolqyn ókilderinen tájirıbe alýyn, kásibı baǵdarlaryn aıqyndaýyn bir izge túsirý, teatr qaıratkerlerin eske alý keshteri men mereıtoılaryn birlese ótkizý, halyqaralyq festıvalder, álemdik deńgeıdegi sheberlik sabaqtary men konferensııalar uıymdastyrý, álemdik teatr ónerindegi baǵyt-baǵdarmen tanysyp, kásibı saýattylyqqa qol jetkizý – osynyń bári búgingi Qazaqstan Teatrlary assosıasııasynyń atqaryp otyrǵan qyzmetiniń negizgi qyry.
Assosıasııanyń uıymdastyrýymen ótken merekelik keshke Almaty qalasynda ornalasqan M.Áýezov atyndaǵy Qazaq memlekettik akademııalyq drama teatry, Ǵ.Músirepov atyndaǵy Qazaq memlekettik akademııalyq jasóspirimder men balalar teatry, Abaı atyndaǵy memlekettik akademııalyq Opera jáne balet teatry, M.Lermontov atyndaǵy Orys memlekettik akademııalyq drama teatry, N.Sas atyndaǵy Orys memlekettik jasóspirimder men balalar teatry, Memlekettik respýblıkalyq akademııalyq nemis drama teatry, Q.Qojamııarov atyndaǵy memlekettik akademııalyq Uıǵyr mýzykalyq drama teatry, Memlekettik Koreı mýzykalyq komedııa teatry, Almaty memlekettik Qýyrshaq teatry, «Astana» mıýzıkl memlekettik teatry, Asanáli Áshimov atyndaǵy «Almaty áýenderine» qarasty «Jańa ǵasyr» teatrynyń ártisteri qatysyp, sahnada ár teatr óz talanttarynyń ónerimen tanystyrdy. Teatrlar alǵash ret mazmuny tereń spektaklderinen úzindiler kórsetip, repertýar jańalyqtarymen bólisti. Bıylǵy Jastar jylyna oraı atalǵan teatr sahnalarynda óner kórsetip júrgen 40-tan astam jas býyn ártis Assosıasııanyń Alǵys hatymen marapattaldy. «Akter – shabyttyń adamy. Ol ónerin tamashalaýǵa kelgen kórermenine árdaıym qýanysh syılaýǵa daıyn turady. Talǵamdy qalyptastyratyn, jańalyqpen tanystyratyn, kópshilikti alǵa qaraı súıreıtin osy mamandyqtyń ókilderi. О́z ómirimen qosa, sahnalyq ómirin de birge alyp júretin, sol sebepti aty men abyroıy uzaq jasaıtyn adam, ol – akter. Ol qaı kezeńde de kerekti mamandyqtyń, uly mamandyqtyń sapynda bolǵan sanatynan eshqashan tómendemek emes», dedi Qazaqstan teatrlary assosıasııasynyń tóraǵasy, KSRO halyq ártisi, Eńbek Eri Asanáli Áshimov óz quttyqtaýynda. Ol, sondaı-aq, Elbasymen kezdeskisi keletinin, kezdesý barysynda ilgerirekte sahnaǵa eńbegi sińgen óner adamdary úshin berilgen «Halyq ártisi» ataǵyn qaıtarý týraly usynys jasaıtynyn aıtty. Tóraǵanyń bul usynysyna teatrǵa jıylǵan áriptesteri qyzý qoldaý bildirdi.
T.Júrgenov atyndaǵy ulttyq óner akademııasynyń rektory Ashat Maemırov Mádenıet jáne sport mınıstri A.Muhamedıulynyń quttyqtaý hatyn oqyp berip, IýNESKO janyndaǵy halyqaralyq mádenı baılanystar uıymy hatshysynyń Qazaqstannyń teatr álemine quttyqtaý joldaǵanyn jetkizdi. Ulttyq sahna óneriniń maqtanyshtary Esmuhan Obaev, Merýert О́tekeshova jáne Tilektes Meıramov Opera jáne balet teatrynyń sahnasynda Atyraý qalasy ákimdiginiń qoldaýymen jaryqqa shyqqan A.Áshimovtiń úsh tomdyq tańdamaly jınaǵynyń tusaýyn kesti. Merekelik kesh sahna sheberleriniń konsertimen jalǵasyn tapty.
Aıgúl AHANBAIQYZY,
«Egemen Qazaqstan»
ALMATY
