Sýretti túsirgen Rústem BAQYTJANOV
27 naýryz – Halyqaralyq teatr kúni dúnıejúzinde 1961 jyldan beri atalyp keledi. Bul kúndi tarıhy myńjyldyqtarmen esepteletin kóne ónerdiń óz ókiline aınalǵanyna shırek ǵasyrdan endi asqan oraldyq teatr da saltanatty sharamen, merekelik kóńil kúımen qarsy aldy. Sahna tórine kıeli ónerdiń ystyǵy men sýyǵyna tózip, kórermen qaýymǵa rýhanı lázzat syılap júrgen qarapaıym qyzmetkerler shaqyrylyp, syı-qurmet kórsetildi.
- Bizdiń teatr búgingi merekege tolaǵaı tabyspen kelip otyr desek, qatelespeımiz. О́zderińiz kýásizder, Hadısha Bókeeva teatry jyl saıyn kórermenge 8-9 premera usynyp júr. Bul úlken eńbek! Bıyldyń ózinde 5 premera qoıyldy. Bul dástúrge aınalyp keledi. Byltyr óner ujymy óziniń 25 jyldyq mereıtoıyn bıik deńgeıde atap ótti. Ataq-dańqy Qazaqstanǵa taraǵan aǵa býynmen birge, ónerge qulash urǵan jastar tolqyny da ósip keledi. О́ńir jastary arasynda akterlik salaǵa den qoıǵan jastarymyz kóptigi qýantady. Sońǵy kezde jastar teatryn ashý jóninde usynys kóp edi. О́ńir basshysy Altaı Kólginov osy usynysty qoldap, Batys Qazaqstan oblystyq Jastar shyǵarmashylyq ortalyǵyna qosymsha 30 shtattyq birlik berý jóninde sheshim shyǵardy. Bul jumys orny teatr salasyn tańdaǵan jas mamandarǵa arnalǵan. Aǵa býyn ókilderiniń salyp ketken sara jolyn jastar jalǵastyrýy tıis. Biz jas talanttardy izdeımiz, olardyń juldyzyn jaqqymyz keledi, alda úlken jumystar kútip tur, - dedi óz sózinde Batys Qazaqstan oblysy mádenıet basqarmasynyń basshysy Qadyrbolat Musaǵalıev.
Saltanatty sharada Hadısha Bókeeva atyndaǵy Batys Qazaqstan oblystyq qazaq drama teatrynyń bir top qyzmetkeri Baqtygúl Habıqyzy, Jasqaırat Sábıtuly, Ásem Jalǵasqyzy, Ádiljan Eltaıuly, Aıakóz Saǵıtjanqyzy, Samal Saılaýqyzy oblys ákimi Altaı Kólginovtiń Alǵys hatymen marapattaldy. Al Ǵalymjan Bópenııazuly, Aqjol Eginbaıuly, Quralbek Ilııasuly, Sergeı Raınskıı, Qanat Aıtqalıuly, Ásel Janbolatqyzy, Danagúl Rýslanqyzyna Batys Qazaqstan oblysy mádenıet basqarmasynyń Alǵys haty tapsyryldy. Aıta keteıik, joǵaryda atalǵandardyń bári sahna artısi emes, olardyń arasynda ádette kórermen kózine túse bermeıtin qarapaıym qyzmetkerler – jaryq berýshi, júrgizýshi, sharýashylyq mamandary da bar.
Osy keshte oblystyq teatr basshylyǵy jyl saıyn tól merekesi tusynda tapsyratyn dástúrli júlde jeńimpazdaryn da jarııa etti. Bul marapatty belgili aıtys aqyny Sholpan Qydyrnııazova men tanymal jýrnalıst Laýra Bekbolatova tapsyrdy. Sóıtip, «Eń úzdik er adam beınesi» atalymyna – Raıymbek Daýrenuly, «Eń úzdik áıel adam beınesi» atalymyna – Nazgúl Turǵynǵalıqyzy, «Jańa róldi jedel meńgergeni úshin» atalymyna – Daryn Saǵynuly, «Úzdik dybys retteýshi» atalymyna – Meıirlan Ermekqalıuly, «Úzdik sýretshi» atalymyna – Qasym Halenuly, «Úzdik tazalyqshy» atalymyna – Sholpan Qońqabaıqyzy, «Úzdik kúzetshi» atalymyna – Aqádil Sábıtuly, «Úzdik tiginshi» atalymyna – Venera О́tegenqyzy, «Qutty qadam» arnaıy atalymyna - Armat Erbolatuly, Danııar Qanatuly jáne Naýryz Abaıuly ıe boldy.
Búginde «aıshylyq alys jerlerden jyldam habar alǵyzǵan» tehnologııa múmkindigin osy jerden kórdik. Hadısha Bókeeva atyndaǵy oblystyq qazaq drama teatry ujymyn tól merekemen quttyqtaǵan áriptesteriniń beınequttyqtaýlary sahna tórindegi led ekrannan tógildi. Olardyń arasynda Shahmet Qusaıynov atyndaǵy Aqmola oblystyq mýzykalyq-drama teatry, Ilııas Omarov atyndaǵy Qostanaı oblystyq drama teatry, Ǵabıt Músirepov atyndaǵy memlekettik akademııalyq balalar men jasóspirimder teatry, Ońtústik Qazaqstan oblystyq ózbek jáne orys teatrlary ujymy oraldyq sahna sańlaqtaryn tól merekemen quttyqtap, shynaıy lebiz bildirdi.
Árıne, teatr toıy – mádenıet salasynda júrgen barsha ónerpazdardyń ortaq merekesi. Saltanatty sharaǵa Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń ánshisi, Qazaqstan Respýblıkasynyń Eńbek sińirgen qaıratkeri Jańylsyn Hasanova ánnen shashý shashsa, belgili aktrısa, Qazaqstan Respýblıkasynyń Eńbek sińirgen qaıratkeri, Memlekettik «Daryn» syılyǵynyń ıegeri Ásel Mámbetova áserli monolog oqyp, «Jan dosym» ánin shyrqap berdi. Teatrdyń taǵy bir tanymal artısi, horegraf Aqmaral Amandyqova daıyndaǵan «Altyn bolashaq» óner stýdııasynyń balǵyn bıshileri ıspan bıin oryndap, sahnanyń sánin kirgizdi. Hadısha Bókeeva atyndaǵy oblystyq qazaq drama teatrynyń jas býyny daıyndaǵan mýzykalyq-dramatýrgııalyq kompozısııa da kópshilik kóńilinen shyqty.
Qazbek QUTTYMURATULY,
«Egemen Qazaqstan»
Batys Qazaqstan
