Ulystyń uly kúni balqashtyqtar batyr jerlesteri – №1 Baqanas orta mektebine Musabek Seńgirbaevtyń esimi berilýi saltanatty sharasynyń kýási boldy. Elin jaýdan qorǵaý jolynda qaza tapqan Musabek Seńgirbaev syndy ulyqty eldiń rýhty eriniń atyn elge tanytý, ǵasyrlardan ǵasyrlarǵa jetkizý – el aldyndaǵy qasıetti paryz. Kópshiliktiń tilegi qabyl bolyp, 2019 jyldyń 25 qańtar kúni Qazaqstan Respýblıkasy Úkimetiniń «Almaty oblysynyń keıbir bilim berý uıymdaryna ataý berý jáne qaıta ataý týraly» №17 qaýlysy shyqty. Atalǵan qaýlyda Balqash aýdany halqynyń bas basylymnyń maqalasynda aıtylǵan usynysy eskerilip, Almaty oblysy, Balqash aýdany №1 Baqanas orta mektebin «Balqash aýdandyq bilim bóliminiń mektepke deıingi shaǵyn ortalyǵy bar Musabek Seńgirbaev atyndaǵy orta mektep» memlekettik kommýnaldyq mekemesi dep ataý kórsetildi. Osy qaýlynyń kúshine enýine baılanysty №1 Baqanas orta mektebinde Naýryz merekesi kúni mektepke batyrdyń aty berilý saltanatty sharasy ótkizildi. Balqash aýdanynyń ákimi Ǵalym Toqpeıisov, batyrdyń týǵan nemeresi Tólegen Musabekov, general Panfılovtyń nemereleri – Almatydaǵy 28-panfılovshylar áskerı-tarıhı murajaıynyń dırektory Alýa Baıqadamova, qoǵam qaıratkeri Aıgúl Baıqadamovalar saltanatty sharada ózderiniń batyr esiminiń ulyqtalýyna baılanysty qýanyshtaryn jetkizdi. Jınalǵan qaýym el gazeti «Egemen Qazaqstan» gazetiniń redaksııasyna osy sharanyń oryndalýyna bastama kóterip, muryndyq bolǵany úshin rızashylyqtaryn bildirdi.
Talǵat SÚIINBAI,
«Egemen Qazaqstan»
