Qazaqstanda jarııa etilgen ústimizdegi jastar jylyna oraı uıymdastyrylǵan kórmeniń ashylýyna Qazaqstan Respýblıkasynyń Túrkııadaǵy Elshisi Abzal Saparbekuly, óner janashyrlary men qazaq shákirtter qatysty.
Ashylý saltanatynyń áýelgi quttyqtaý sózin sóılegen Elshi Abzal Saparbekuly, Elshilik retinde Qazaqstannyń Túrkııada keń tanystyrylýyna erekshe mán beretindikterin atap ótip, aıryqsha túrde mádenı jumystardyń bel ortasynda belsendilik tanytyp júrgen «Kók Tý» qazaq mádenıeti qoǵamyna alǵys aıtty. Talantty sýretshi Kárim Baıǵutovtyń jastar jyly aıasynda uıymdastyrylǵan kórmesi bul turǵyda mańyzdy ekendigin salmaqtaı sóılegen Elshi myrza, qonaqtardy Naýryz merekesimen quttyqtady.
Sóz alǵan qurmetti qonaqtardyń biri, professor Húlııa Kasapoǵlý Chengel hanym bolsa, Qazaqstannyń Tuńǵysh Prezıdenti Nursultan Nazarbaevtyń sarabdal saıasatyna joǵary baǵa berip Elbasymyzdyń uly aqyn Maǵjan Jumabaıdyń «Men jastarǵa senemin!» muratymen úndes qadam jasaǵanyn atap ótti. «Elbasy Nazarbaevtyń sarabdal saıasaty arqasynda qazaq jastarymen naýryzdy Ankara tórinde qarsy alyp otyrmyz. Bir ǵasyr buryn qazaqtyń ataqty birtýar aqyny Maǵjan Jumabaı:
«Men senemin jastarǵa.
Alash atyn aspanǵa
Shyǵarar olar bir tańda,
Men jastarǵa senemin!» degen edi.
Maǵjannyń jastar týraly ıdeıasy Nazarbaevtyń jastar jylymen jalǵasyn tapty. Men de jastarǵa senemin! Jastar jyly qutty bolsyn!»,-dep sózin túıindedi.
Kórmeden keıin Naýryz merekesine oraı uıymdastyrylǵan merekelik is-shara konsertpen jalǵasyn tapty. Ulttyq naqyshtaǵy ásem áýen saýda ortalyǵyn sýsyndatty. Án-jyrymen shashý shashqan ónerpazdar kópshilik kórermenniń kóńilinen shyqty.
