Jambyl oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Tımýrjan Nurymbetovtyń aıtýynsha, elimizdegi kedeıliktiń shegi kúnkóristiń eń tómen deńgeıi 70 paıyzǵa deıin kóterilip, 20 myń 800 teńge bolyp otyr. Osyǵan oraı qaıta naqtylaýda, óńirdegi atalmysh áleýmettik kómekti alýshylardyń sany da arta túsken. Basqarma basshysynyń aıtýynsha, jan basyna shaqqandaǵy tabysy kedeılik sheginen tómen 29650 otbasynyń áleýmettik kartasy túzilgen, onda barlyǵy 150400 adam qamtylatyn bolady. Al, osy ýaqytqa deıin bul kórsetkish 14849 otbasyny, ıaǵnı 74517 adamdy quraǵan.
Jıyn barysynda Asqar Myrzahmetov ataýly áleýmettik kómekpen ádistemege sáıkes belgilengen otbasylardyń tolyǵymen qamtylýyna asa nazar aýdaryp, esepteý kezindegi ketken kemshilikterdiń kesirinen muqtaj azamattardyń qaltarysta qalyp ketpeýin eskertti. Sol úshin olardyń otbasylyq tabystaryn esepteý sharalaryn asa muqııat júrgizýdi tapsyrdy. Ákim óz sózinde jan basyna shaqqandaǵy tabysy kedeılik sheginen asatyn, alaıda óńirde qarjylaı qoldaýǵa zárý ózge de otbasylardyń az emestigin basa aıtyp, olarǵa da qajetti kómekter kórsetýdiń tetikterin oılastyrýdy tapsyrdy. «Bul oraıda, aldaǵy ýaqytta az qamtylǵan jáne kópbalaly otbasylardy qoldaýǵa arnalǵan oblystyq baǵdarlama daıyndalýy múmkin. Oǵan qajetti qarajat oblystyq bıýdjetten qarastyrylyp, granttar nemese tıimdi jolmen qaıtarý qaryzdar berý kózdelýde. Ol halyqtyń áleýmettik osal toptaryna tıimdi tabys kózin qalyptastyrýǵa múmkindik berý kerek», dedi Asqar Myrzahmetov.
Jambyl oblysy
