Baıqaýdy uıymdastyrýǵa «Ǵylymı medısınalyq qoǵamy» qoǵamdyq birlestigi uıytqy bolyp otyr.
Baıqaý bıyl 31 tamyzda aıaqtalady. Buryn respýblıka deńgeıinde ótikizilip kelgen shyǵarmashylyq jarys ústimizdegi jyldan bastap halyqaralyq deńgeıge kóterildi. Bıyl baıqaýǵa qatysýǵa basqa elderden de balalar shaqyrylyp, jarystyń aıasy keńip keledi.
Bul bastamanyń maqsaty – deni saý balalardyń túrli dertterge shaldyqqan zamandastaryna degen túsinistigi men shydamdylyǵyn shyńdaý bolyp tabylady. О́ıtkeni, kemis kózqarastar naýqas balalardyń áleýmettik belsendiligi men ómirge degen qushtarlyǵyna tusaý salatyny aıan.
Baıqaý eki kezeńnen turady. Birinshi – Jazýshylar baıqaýyna qatysýshylar «Bir kúni tańerteń oıanyp, men ózimdi erekshe bolǵanymdy sezindim» degen sóılemnen bastalatyn shaǵyn shyǵarmany (ertegi, áńgime, novella, ósıet áńgime) kez kelgen janrda jazyp shyǵýy tıis. Bıyl baıqaýǵa sheteldik balalar da qatysatyndyqtan, olar aǵylshyn, orys, qazaq tilderinde qalam terbeıtin bolady.
Qatysýshylarǵa shyǵarmalaryn ana tilinde de jazýǵa erik berilgen. Biraq baıqaýdyń úsh tiliniń birinde aýdarmasy qosa berilýi tıis.
Ekinshi kezeń – Sýretter baıqaýynda birinshi kezeńde qazylar alqasy iriktegen Jazýshylar baıqaýynyń úzdik shyǵarmalaryna sýret salýǵa tapsyrma beriledi. Ekinshi kezeńniń de barlyq týyndylaryn kásibı qazylar alqasy saraptaıdy.
Baıqaý qorytyndysy boıynsha eń úzdik shyǵarmalar men sýretter kitap bolyp shyǵady. Kitapty satýdan túsken qarajat onkologııalyq jáne basqa da aýyr syrqattarmen shaldyqqan balalarǵa tabystalady.
Sondaı-aq úzdik dep tanylǵan shyǵarmalardyń birine spektakl qoıylady. Bul spektakldegi rólderdi múmkindigi shekteýli balalar oınaıdy.
Baıqaý barysynda tanymal balalar jazýshylary men sýretshileri shaqyrylyp, olar Almaty qalasyndaǵy balalar ortalyqtarynda, aýrýhanalarda emdelip jatqan balalarǵa art-terapııa retinde, sondaı-aq vebınar túrinde onlaın-rejıminde jazý jáne beıneleý óneri boıynsha sheberlik dáristerin ótkizedi.
Al 2018 jyly baıqaýǵa Sanofi, Qazaqstan-Reseı medısına ýnıversıteti, «Drýjnye rebıata» gazeti, «Unity» otbasylyq festıvali men Almaty qalalyq kitaphanalar júıesi demeýshilik tanytyp, qoldaý kórsetken bolatyn. Al 2019 jyly Almaty qalalyq balalar klınıkalyq aýrýhanasy men Pedıatrııa jáne balalar hırýrgııasy ǵylymı-zertteý ınstıtýtynyń emdelýshileri qatysatyn baıqaýǵa «Almatykitap baspasy» demeýshi bolyp otyr.
Almaty
