Buqar jyraý aýdanyndaǵy Sadovoe eldi mekenine tótenshe jaǵdaılar departamenti men Ulttyq ulanǵa qarasty №52859 áskerı bólimniń kúshteri jumyldyrylǵan. Qazirgi ýaqytta Samarqan sý qoımasyna jaqyn bul jerde 131 adam, 31 tehnıka birligi shoǵyrlanyp, jumys isteýde. Sý ketedi-aý degen tustarǵa qum toltyrylǵan 5 myń qap qalanyp, qorǵanys shebi túzilgen. Ázirge eldi mekende sý alǵan úı joq.
Respýblıkalyq, oblystyq jáne jergilikti mańyzdaǵy joldardyń keıbir oıpań tustarynan sý júrip jatyr. Bul jerlerde polısııa qyzmetkerleri, jol qyzmeti men jergilikti atqarýshy organdardyń ókilderi kezekshilik uıymdastyrǵan. Sý aǵyp jatqan jerlerge eskertý belgileri qoıylyp, jol tabanyn shaıdyrmaýdyń amaldary qarastyrylyp jatyr.
Keshe Jańaarqa aýdanynda joǵalyp ketken er adamnyń máıiti daladan tabyldy. Qazirgi ýaqytta marqumnyń ólimine tasqyn sýdyń sebepshi bolǵan, bolmaǵany tekserilip jatyr.
Oblystaǵy sý qoımalaryndaǵy sýdy aǵyzý jumystary jalǵasýda. Jergilikti TJ departamentiniń baspasóz qyzmeti taratqan málimetke sensek, ázirge sý tasqyny jaǵdaıy turaqty jáne ol tıisti organdar tarapynan udaıy baqylaýǵa alynǵan.
Búgin apparattyq jıyn barysynda oblys ákimi E.Qoshanov jaǵdaıdyń áli de kúrdeli ekenin aıtty. «Eń birinshi kezekte turǵyndarǵa kómektesý kerek. Eger qandaı da bir shyǵyndar bolsa, esebin shyǵaryp, qalpyna keltirgen jón», dedi ol.
Qaırat ÁBILDA,
«Egemen Qazaqstan»
Qaraǵandy oblysy
