Qoǵamdyq keńistikti modernızasııalaý jáne jaıly qalalyq ortany qalyptastyrý úshin rekonstrýksııalanǵan kóshelerde ekologııalyq trotýar plıtkalary, energııa jınaqtaýshy jaryq kózderi, kóshe jıhazy, sport jáne balalar alańdary, zamanaýı kishi sáýlet pishinderi paıda bolady.
Bulardan ózge, ǵımarattardyń barlyq kire beristeri biryńǵaı stılge kóshiriledi. Jasyl jelekke erekshe mán beriledi, burynǵy bar aǵashtardy saqtaı otyryp, jańalary otyrǵyzylady, sýarýdyń avtomatty júıesi tartylyp, eski aryq naýalary aýystyrylady.
Almaty ákimi Baýyrjan Baıbek qalany abattandyrý boıynsha ótken jumys keńesi barysynda Jaıly qalalyq orta basqarmasy men Qala qurylysyn baqylaý basqarmasyna barlyq qurylys jumystarynyń oryndalýyn barynsha qatań baqylaýǵa alýdy, sonymen qatar buryn jańarǵan kóshelerdegi oryn alǵan aqaýlardy merdigerlik uıymdar esebinen joıýdy tapsyrdy.
Jibek joly (Jeltoqsan - Seıfýllın), Baıseıitova (Qabanbaı batyr - Tóle bı) kósheleri men Dostyq (Qazybek bı - Qurmanǵazy) dańǵyly boıyndaǵy ýchaskelerde jaıaý júrginshiniń kedergisiz ótkelderin qamtamasyz etý úshin bıylǵy jyly jóndeý jumystary kezeń-kezeńimen júrgiziledi. Aldymen kósheniń bir jaǵy, sodan keıin ekinshisi jóndeledi. Arnaıy qorshaýlar jáne júrginshi traptary, merdigerlik uıymnyń barlyq baılanys nómirleri jazylǵan nysannyń pasporty qoıylady.
Aıta keterligi, jaqynda el Prezıdenti Qasym-Jomart Toqaev óńirler ákimderimen ótkizgen keńes barysynda halyqtyń jaqsy ómir súrýine tikeleı yqpal etetin ınfraqurylymdyq sıpaty bar júıeli máselelerdi sheshýge aıryqsha nazar aýdarý qajettigin atap ótken edi.
2015 jyly qala turǵyndarynyń jalpy talqylaýynan ótken «Almaty-2020» damý Baǵdarlamasy aıasynda megapolıste qalanyń tarıhı ortalyǵynyń 60%-y jańardy, 600-ge jýyq kóshe, 1400-tan astam eski aýlalar jóndeldi. Kóshe jaryqtarynyń úshten biri dıodty jáne energııa jınaqtaýshy shamdarǵa aýystyryldy, 300 km aryq, 2000 km ınjenerlik jeliler tartyldy. Qalanyń barlyq jer asty ótpeli joldary jańardy.
Bıylǵy jyly taǵy da 680 aýlany jańartý josparlanǵan, ıaǵnı qalanyń barlyq kópqabatty úıleriniń 50%-y qamtylady. Sáýir aıynyń ortasynan bastap 120-dan astam kóshege ortasha jóndeý jumystary júrgiziledi. Sonymen qatar, qalanyń 12 yqsham aýdanynda 440-tan astam jańa joldar salynady dep kútilýde. Almaty ákimdiginiń bastaýymen ótip jatqan «Jasyl meken» aksııasy barysynda tek bıylǵy kóktemniń ózinde ǵana qalanyń barlyq aýdandarynda jergilikti pıtomnıkterde ósirilgen 12 myńnan astam aǵashty otyrǵyzý josparlanǵan.
ALMATY
