Kindik qany tamǵan jeri – Qyzylorda oblysynyń Aral aýdany. Áke-sheshesi sol zamannyń baqýatty kisileriniń qatarynan sanalǵan. Sodan bolar, ákesi Ernııaz «pármendilerdiń» buıryǵymen qýdalaýǵa ushyraıdy. Kishkentaı Zıbany sol tusta Mahambet Kelimbetov degen aýyldasy óziniń perzenti bolmaǵanyn alǵa tartyp, atyna jazdyrtyp alady. Boıjetken shaǵynda Zıba Aralǵa qarasty Qulandy aýylynyń azamatymen turmys qurady. Aral teńizi kemeldenip turǵan sonaý shaqta olar balyq aýlaý isin otbasylyq kásipke aınaldyrǵan.
– Áıeldiń oshaq basyndaǵy tirligi taýsylǵan ba?! Biz de jas kezde ózimizge qaraǵan kez kelgen úı men tystyń sharýasyn ýaqytpen sanaspaı atqara beretinbiz. Egin ordyq, sıyr saýý, t.b. jumystarǵa aıanbaı aralastyq. Áıteýir otaǵasynyń janynan qalmaı, erlershe jumys istegenimiz ras. Onyń qaısysyn aıtyp taýysasyń, kóp qoı,– deıdi ǵasyr kýágeri.
Uzaq jasaǵan áje asty talǵamaı, óziń qalaǵanyńdy adal dastarqannan qorek etý densaýlyqqa paıdaly deıdi. Al kóp jasaýdyń syry nede degen saýalymyzǵa ol: «Jas kezimde maldyń sútin saýmaldaı, ıaǵnı jylylaı ishýdi daǵdyǵa aınaldyrdym, múmkin sodan bolar. Osy kúnge deıin basty baılyqqa shaǵym aıtqan kúnderim az dep jaýap qatty», – Zıba áje.
Ony nazardan tys qaldyrmaı baptap, batasyna kenelip otyrǵan shańyraqtaǵy kelin Kúnsulýdyń da bedeli aýyldastarynyń aldynda bir tóbe. Enesine degen qamqorlyǵy kópke úlgi. Bir qyz ben bir uldy ómirge ákelgen qart kisi qazir ulynan 4 nemere, 2 shóbere, qyzynan 5 jıen nemere, 12 jıen shóbere súıip otyr. Bozoılyqtar Zıba ájeni sózge sheshen adam dep biledi. «Ol kisiden asyryp kim aıtqan deısiń?!», dep taýyp aıtatyn sheshendigine tamsanady. Al qoldaǵy nemere-shóbereleri ájeleriniń árdaıym súıenishi. Úlken kisi eldegi jańalyqtardyń anyǵyn keıde solar arqyly estip alady.
«Meniń shashym jas kezimde óte uzyn boldy, tipti eki burymymdy orap kúltemniń eki qaltasyna salyp alatyn edim», degen áje jastarǵa bylaı dep ósıetin aıtady.
– Bolashaq tutqasyn ýaqyt kóshimen almasyp jańa jas urpaq ustaıtyny aqıqat. Sol jastarymyz zeıindi, ultqa adal, eldik dástúrden attamaýy tıis. Onyń barlyǵy berekeli shańyraqtaǵy tamshydaı turaqty beriletin tárbıemen qalyptasady. Árbirimiz osyǵan myǵym bolsaq, keleshegimiz jaman bolmas, – deıdi Zıba áje.
Muhtar MYRZALIN,
Qazaqstan Jýrnalıster odaǵynyń múshesi
Aqtóbe oblysy, Shalqar aýdany, Bozoı aýyly
