Shara barysynda «Qazaqstan» RTRK AQ basqarma tóraǵasy Erlan Qarın «Kinomax» jańa mobıldik qosymshasynyń iske qosylýy jaıynda jańalyqtarymen bólisti.
Ol:– «Qazaqstan» korporasııasy zaman talabyna saı jumys jasaýda. О́tken jyly «Qazaqstan tv» mobıldik qosymshasyn iske qosqan bolatynbyz, sol arqyly telearnalarymyzdyń jobalaryn onlaın rejımde kórý múmkindigi paıda boldy. Azdaǵan ýaqyttyń ishinde qosymshany jarty mıllıonnan astam qoldanýshy júktep aldy. Sondaı-aq áleýmettik jelilerdegi jeke akkaýnttarymyzda jazylýshylar sany 1 599 762 adamǵa jetti. Al, «Qazaqstan tv» Youtube arnasynyń jazylýshylar sany mıllıonǵa jetip otyr, sondyqtan qazirgi sátte elimizdegi memlekettik telearnalardyń ishinde eń aldyńǵy orynda tur. Maýsym aıynda «Youtub-tyń altyn bastyrmasyn» ıelenýimiz ábden múmkin. Odan basqa, korporasııamyzǵa qarasty barlyq akkaýnttar men domender Qazaqstan tv-ge aýystyryldy. Jastar jyly aıasynda Youtube arnamyzda jastarǵa arnalǵan sıtkom daıyndap jatyrmyz, ol týraly keıinirek bilersizder, dedi.
Sondaı-aq, E.Qarın «Kinomax» mobıldi qosymshasy týraly baıandap berdi.
– Búgin Sizderdiń nazarlaryńyzǵa usynyp otyrǵan «Kinomax» mobıldi qosymshasy – bul Andriod jáne IOS platformalarynda táýligine 24 saǵat boıy qoljetimdi vıdeoservıs. Osy qosymsha arqyly otandyq telehıkaıalar, kórkem jáne derekti fılmder, anımasııalyq fılmderdi onlaın rejımmen qatar, offlaın rejımde de kórýge bolady. Qosymshada:«Kinomax-tegi jańa fılmder» degen aıdarda jańadan engizilgen kınotýyndylar jınalǵan, «Osy aptada tanymal» bóliminde qoldanýshylardyń arasynda tanymal, joǵary baǵalanǵan kontent, al «Dál qazir kórýde» - sol sátte qoldanýshylardyń tamashalap jatqan kontentin kóre alasyzdar. Sonymen qatar, kishkentaı búldirshinder úshin «Balapan» rejımi qarastyrylǵan. Bul toptamada «Balapan» telearnasynyń baǵdarlamalary, anımasııalyq fılmder usynylǵan. Bul vıdeoservıs otandyq kontentti damytýmen qatar aýdıtorııa suranysyna saı sapaly jobalardy usyný maqsatynda iske asyryldy. Osy arqyly biz kórermenderimizge ne qyzyqty ekenin eskerip, básekege qabiletti jáne túrli janrlardaǵy kontentti usynýdy kózdeımiz, dedi ol.
Sonymen qatar, Erlan Qarın «Qazaqstan» korporasııanyń uıymdastyrýymen ótetin Dımash Qudaıbergenniń konsertine daıyndyq barysy jaıly málimet aıtyp ótti.
Altynaı Tuıaqova
