Qazaqstan Respýblıkasynyń Syrtqy ister mınıstri Beıbit Atamqulov Túrikmenstannyń tóraǵalyǵymen Máskeýde ótken Táýelsiz Memleketter Dostastyǵy Syrtqy ister mınıstrleri keńesiniń kezekti otyrysyna qatysty.
Is-shara barysynda syrtqy saıası vedomstvolarynyń basshylary Dostastyq aıasyndaǵy ózara is-qımyldyń ózekti máselelerin talqylady. Negizgi nazar TMD-ǵa qatysýshy memleketterdiń qazirgi zamanǵy qaýip-qaterlerge qarsy turý jónindegi yntymaqtastyǵyn nyǵaıtýǵa, sondaı-aq ekonomıkalyq, mádenı-gýmanıtarlyq jáne ǵylymı-tehnıkalyq salalardaǵy ózara is-qımyldy keńeıtýge aýdaryldy.
Delegasııa basshylary 2018 jyly TMD sheńberinde kóp deńgeıli SIM-aralyq konsýltasııalar josparyn iske asyrý qorytyndylary týraly esepti tyńdap, 2019 jylǵa arnalǵan jańa Jospardy bekitti. Bul qujatqa sáıkes, syrtqy saıası josparlaýǵa, qazirgi zamanǵy qaýip-qaterlerge qarsy is-qımylǵa, qarýsyzdaný taqyrybyna, ekonomıkalyq yntymaqtastyqty damytýǵa, aqparattyq saladaǵy ózara is-qımylǵa, sondaı-aq BUU, Eýropadaǵy Qaýipsizdik jáne Yntymaqtastyq Uıymy jáne Eýropa Odaǵy sııaqty halyqaralyq uıymdarmen yntymaqtastyqqa qatysty konsýltasııalar ótkizý josparlanǵan.
Otyrys barysynda B. Atamqulov «Qazaqstan TMD-nyń senimdi jáne belsendi qatysýshysy bola otyryp, Dostastyqqa qatysýshy memleketter arasyndaǵy ózara tıimdi yntymaqtastyqty barlyq salalarda damytýdy jalǵastyrýǵa baǵyttalǵanyn» atap ótti.
Qazaqstan syrtqy saıası vedomstvosynyń basshysy júrgizilgen birlesken jumystyń arqasynda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń TMD-nyń qazirgi zamanǵy jaǵdaılarǵa beıimdelýi týraly bastamasy tabysty iske asyrylǵanyn atap ótti. Nátıjesinde sońǵy ýaqytta qatysýshy memleketterdiń uıym qyzmetine múddeliliginiń aıtarlyqtaı ósýi baıqalady.
Sonymen qatar, Dostastyqqa qatysýshy memleketter basshylarynyń nusqaýlaryna sáıkes TMD elderiniń ekonomıkalyq saladaǵy ózara is-qımylyn jandandyrý qajettiligi atap ótildi.
Qazaqstan SIM basshysy sondaı-aq Tájikstan Respýblıkasynyń 2018 jyly Dostastyqtaǵy tóraǵalyǵynyń qorytyndysyna joǵary baǵa berip, onyń óte mazmundy jáne jemisti bolǵanyn atap ótti. Oǵan qosa, Qazaqstan tarapy Túrikmenstandy uıymǵa tóraǵalyqtyń qabyldanýymen quttyqtap, túrkmen tarapy usynǵan tóraǵalyq tujyrymdamasyn tabysty iske asyrýǵa jan-jaqty járdemdesýge daıyn ekendigin bildirdi.
Otyrys barysynda delegasııa basshylary qabyldaý bastamasy túrkimen tarapyna tıesili TMD-ǵa qatysýshy memleketterdiń syrtqy saıası vedomstvolary arasyndaǵy áriptestikti jandandyrý jónindegi is-qımyl baǵdarlamasynyń jobasyn qarap, irgeli zertteýler salasyndaǵy memleketaralyq qatynastardy úılestirý týraly, murajaı isi salasyndaǵy yntymaqtastyq týraly, sondaı-aq TMD joǵary organdarynyń - Memleket basshylary keńesiniń jáne Úkimet basshylary keńesiniń aldaǵy otyrystaryna engiziletin bas bostandyǵynan aıyrýmen baılanysty emes jazalardyń oryndalýyn berý týraly halyqaralyq sharttardyń jobalaryn maquldady.
Syrtqy ister mınıstrleri 1941-1945 jylǵy Uly Otan soǵysynyń áskerı jerleý oryndary men áskerı eskertkishterine tıisti kútim jasaý jáne saqtaý qajettiligi týraly Úndeý qabyldady, sondaı-aq ekinshi dúnıejúzilik soǵys bastalýynyń 80 jyldyǵyna baılanysty TMD-ǵa qatysýshy memleketter basshylarynyń málimdemesiniń jobasyn maquldady.
TMD Syrtqy ister mınıstrleri keńesiniń kezekti otyrysy Ashhabadta 2019 jyly 10 qazanda ótedi.
