Turǵyndarǵa yńǵaıly bolý úshin ataýly áleýmettik kómekti (AÁK) taǵaıyndaý boıynsha qujattardy jumyspen qamtý ortalyqtary men aýdan ákimshilikterinde tapsyrýǵa bolady, dep habarlaıdy elorda ákimshiliginiń resmı saıty. Jańa formattaǵy ataýly áleýmettik kómekti taǵaıyndaý úshin qujattardy qabyldaǵannan bastap astanalyq jumyspen qamtý ortalyǵy men aýdan ákimshilikterine 3 myńnan asa turǵyn ótinish bildirdi.
«1 sáýirden bastap AÁK taǵaıyndaýdyń jańa krıterııleri anyqtaldy. Oǵan sáıkes astana turǵyndary úshin jan basyna shaqqandaǵy kedeılik shegi 21 572 teńge deńgeıinde. Sáıkesinshe, bizge áleýmettik kómek alý úshin otbasyndaǵy bir adamǵa shaqqandaǵy kiris mólsheri kedeılik sheginen aspaıtyn barlyq adamdar kele alady. Búginge deıin biz 3 myńnan astam adamǵa keńes berdik, 500 turǵynnyń qujatyn qabyldadyq», – dedi qalalyq jumyspen qamtý ortalyǵy dırektorynyń orynbasary Danııar Nurpeısov.
Turǵyndarǵa yńǵaıly bolý úshin jumyspen qamtý ortalyǵy saǵat 8:30-dan 20:00-ge deıin jáne túski úzilissiz jumys isteıdi. Sondaı-aq, qujattardy tek jumyspen qamtý ortalyǵynda ǵana emes, aýdan ákimdikterinde de tapsyrýǵa bolady. «Qujattardy sáýir aıy boıy tapsyrýǵa bolady. AÁK úshin qujatty turǵyndar aıdyń qaı kúni tapsyrǵanyna qaramastan, tólem alady (rastalǵan jaǵdaıda). Ol 1 sáýirden bastap taǵaıyndalady. Eńbek jáne halyqty áleýmettik qorǵaý mınıstrligi «E-halyq» jańa aqparattyq bazasyn engizdi.
Oǵan sáıkes ótinish bildirýshiden ıdentıfıkasııa júrgizý úshin tek qana jeke kýáligi talap etiledi. Biraq erejege saı, eger jeke tulǵanyń málimeti bazada bolmasa, onda balalardy jáne ózin kýálandyratyn týý týraly kýálik, banktik esep-shot talap etiledi», - dep túsindirdi ol. Kóp balaly ana Indıra Joldybekova úshin AÁK úlken kómek bolady.
«Men – jeti balanyń anasymyn, «Altyn alqa» ıegerimin. Jumyspen qamtý ortalyǵyna AÁK alý úshin qujat tapsyrýǵa keldim. Kópbalaly analarǵa arnap osyndaı múmkindik jasaǵanyna rahmet aıtamyn. AÁK rásimdeý prosesi óte tez, men kezekte 10-15 mınýt qana turdym. Barlyq qujattardy operator qabyldap aldy. Kúıeýimdi jumyssyz retinde tirkedi, jumys taýyp berýge ýáde etti», – dedi ol. Kópbalaly ana Botakóz Januzaqqyzy alǵash ret qujat tapsyrýyna baılanysty joldasynyń eńbek tabysy týraly anyqtama ákelýi kerek boldy, sebebi bazada ol týraly málimet joq.
«Barlyq qujattar daıyn, tek joldasymnyń eńbek tabysy týraly anyqtama joq. Qazir alyp kelemin, sosyn qujattardy qabyldaımyz dedi. Qalǵan qujattar túgel. Eger AÁK alsaq, bizdiń otbasy úshin úlken kómek bolar edi», – dedi ol.
