Taraz oblysynyń qutqarýshylary jyldaǵy dástúrmen bıyl da Soltústik Qazaqstan jerine taban tirep, sý tasqynyn eńserýge belsene kirisip ketken. Jedel-qutqarý jasaǵynyń jetekshisi Qýanysh Ábilqasymovtyń sózine qaraǵanda, olar qolaısyz jaǵdaı qalyptasqan jerlerge, atap aıtqanda, Aıyrtaý jáne Ǵ. Músirepov aýdandaryna óz erikterimen suranypty.
Qysqa ýaqyttyń ishinde jergilikti atqarýshy oryndarmen, turǵyndarmen yntymaqtasa otyryp, kóptegen is-sharalarǵa qatysypty. Sharyq jáne Jembaraq ózenderindegi qaýipti sý aıdyndary mańdarynda bógesinder turǵyzylyp, bir myń tekshe metrden astam muz oıylǵan. Muz qozǵalysyn toqtatýdyń barlyq múmkindikteri qarastyrylǵan.
Chıstopole aýylynyń turǵyndary da kók tústi formadaǵy qutqarýshylardy qýana qarsy aldy. Aqanburlyq ózenindegi kópirdi jóndeý kezinde halyqtyń qalypty ómir súrýin qamtamasyz ete otyryp, adamdar men júkterdi qaıyqpen tasymaldaýdy júzege asyrdy. Sonymen qatar Konstantınovka, Gýsakovka, Rýzaevkada turatyn adamdardyń qaýipsizdigi oılastyrylyp, qaýip-qaterlerdiń joly kesildi.
«Men Qyzyljar óńirindegi qutqarý sharalaryna 2004 jyldan beri atsalysyp kelemin. Osy sebepti jer jaǵdaıyn da, adamdardyń minez-qulqyn da jaqsy bilemin. О́zimizdi úıde júrgendeı sezinemiz. Qalypty jumys isteýge barlyq múmkindikter týdyrylǵan», deıdi Qýanysh Ábilqasymov.
