Qazaqstannyń Tuńǵysh Prezıdenti – Elbasy «Nur Otan» partııasynyń ortalyq apparatyna baryp, onyń qazirgi jumysymen tanysty jáne qurylymdyq bólimsheler jetekshileriniń qatysýymen keńes ótkizdi.
Elbasy Nursultan Nazarbaev elimizde bolǵan sońǵy saıası oqıǵalarǵa baılanysty partııanyń aldynda strategııalyq mańyzy bar birqatar mindet turǵanyn aıtty.
– Biz jaqynda «Nur Otan» partııasynyń sezin ótkizip, onyń 20 jyldyq mereıtoıyn atap óttik. Partııanyń jańa maqsat-mindetteri aıqyndaldy. Elimizde bolǵan oqıǵalar barsha jurtqa belgili. Men partııanyń, Qaýipsizdik keńesiniń jáne Qazaqstan halqy Assambleıasynyń Tóraǵasy bolyp qala beremin, – dedi Qazaqstannyń Tuńǵysh Prezıdenti.
Nursultan Nazarbaev belsendi ári nátıjeli jumystyń arqasynda «Nur Otan» partııasy elimizdiń basty saıası kúshine aınalǵanyn atap ótti.
– Reformalar, damý, azamattyq qoǵam – partııanyń jumyldyrýshy negizi. Qoǵamnyń turaqtylyǵy, halyqtyń birligi men kelisimi ósip-órkendeýimizdiń basty basymdyqtaryna aınaldy. Azamattarymyzdyń laıyqty ómir súrý deńgeıin qamtamasyz etý jáne Qazaqstandy áleýmettik memleket retinde damytý máselesi basym baǵytymyz bolyp qala beredi, – dedi «Nur Otan» partııasynyń Tóraǵasy.
Qazaqstannyń Tuńǵysh Prezıdenti turǵyndar úshin jańa jumys oryndaryn ashýdyń mańyzdylyǵyn atap ótip, áleýmettik masyldyqqa jol bermeý qajettigine basa mán berdi.
Nursultan Nazarbaev Qazaqstan Respýblıkasy Prezıdentiniń kezekten tys saılaýynyń ótýine baılanysty «Nur Otan» partııasy aldaǵy saılaý naýqanyna belsendi qatysýǵa tıis ekenin aıtty.
– Keshe Qasym-Jomart Toqaev óziniń zańdy quqyǵyn paıdalanyp, Qazaqstan Prezıdentiniń kezekten tys saılaýyn ótkizý týraly Jarlyqqa qol qoıdy. Bul saılaý bıliktiń zańdylyǵyn odan ári nyǵaıtyp, elimizde turaqtylyqty qamtamasyz etý úshin qajet. Endi bizge partııanyń sezin ótkizip, el prezıdenttigine kandıdatýra usynýymyz kerek. Partııanyń apparaty sezdi ótkizý úshin qajetti jumystardyń bárin jyldam iske asyrýǵa tıis. Partııamyzdyń atynan kandıdatýra usynǵannan keıin Qoǵamdyq saılaý shtabynyń jumysyn uıymdastyrý qajet. Bul jumyspen meniń birinshi orynbasarym Máýlen Áshimbaev aınalysady, – dedi Qazaqstannyń Tuńǵysh Prezıdenti.
Sonymen qatar, Nursultan Nazarbaev saılaýdy tolyǵymen el zańnamasyna sáıkes jáne barlyq demokratııalyq normalar men rásimderdi saqtaı otyryp ótkizý qajettigine nazar aýdardy.
Keńes barysynda partııa Tóraǵasynyń birinshi orynbasary M.Áshimbaev saılaý shtabyn uıymdastyrý jumystary týraly baıandady.
Nursultan Nazarbaev M.Áshimbaevtyń aqparatyn nazarǵa alyp, partııanyń ortalyq apparaty men fılıaldary aldaǵy is-sharalardy uıymdastyrý úshin jyldam ári úılesimdi jumys isteýge tıis ekenine toqtaldy.
– Partııaǵa zor jaýapkershilik júktelip otyr. Bul – tańdap alǵan saıası baǵdarymyzdyń sabaqtastyǵyn jáne ózim belgilegen barlyq strategııalyq mindetterdi iske asyrýdy qamtamasyz etý. «Nur Otan» Qazaqstandy jańǵyrtatyn basty qozǵaýshy kúshke aınaldy. Sondyqtan, belgilengen mindetterdiń bári tolyǵymen oryndalýǵa tıis, – dedi Nursultan Nazarbaev.
«Nur Otan» partııasynyń Tóraǵasy «Baqytty otbasy», «Qutty meken», «Aýyl – El besigi» jáne «Halyqqa kómek» jobalaryn tıimdi iske asyrý máseleleri týraly aıtty.
Sondaı-aq, Elbasy partııanyń 2030 jylǵa deıingi jańa baǵdarlamasyn iske asyrý úshin naqty is-sharalar josparyn bekitýdi tapsyrdy.
Nursultan Nazarbaev partııanyń memlekettik basqarý júıesi úshin kadr daıyndaıtyn negizgi qurylym bolýǵa tıis ekenin atap ótip, «Nur Otan» partııasynyń respýblıkalyq kadr rezervin jasaqtaýdy tapsyrdy.
Elbasy memlekettik saıasattyń ózekti máseleleri boıynsha partııa músheleri júrgizetin tıimdi aqparattyq-túsindirý jumystarynyń mańyzdylyǵyn atap ótti.
– «Nur Otan» partııasy meniń saıasatymnyń mánin túsindirý isinde basty ınstıtýt bolýǵa tıis. Ýaqyt pen qol jetkizgen jetistikter ustanǵan baǵytymyzdyń durystyǵyn kórsetti. Bul baǵdardy odan ári iske asyrý úshin naqty jumys isteý kerek, – dedi Qazaqstannyń Tuńǵysh Prezıdenti.
