Ortalyqtyń qyzmeti aýyr somatıkalyq buzýshylyqtarǵa ulasqan ortalyq júıkeniń sal aýrýy, túrli deńgeıdegi epılepsııa, hromosomalyq aýrýlar, aýtızm, sóıleý apparaty qatty buzylǵan jáne psıhıkalyq aýytqýlary bar olıgofrenııamen qatar aqyl-oıynda kemistigi bar balalarǵa stasıonarlyq jáne jartylaı stasıonarlyq jaǵdaıda arnaıy áleýmettik qyzmet kórsetýge baǵyttalǵan.
Mekemeniń negizgi mindeti balanyń múmkindikterin damytý men ony qoǵamǵa beıimdeý úshin barynsha qolaıly jaǵdaı jasaý bolyp tabylady.
Qazirgi ýaqytta ortalyqta 283 bala bar, olardyń ishinde kúndizgi ýaqytta qaralatyndar 159 tárbıelenýshi jáne stasıonarlyq bólimde turaqty turatyndardyń sany 124 bala. Ortalyq turmystyq, medısınalyq, pedagogıkalyq, psıhologııalyq, eńbek, mádenı, quqyqtyq jáne ekonomıkalyq qyzmetterdi kórsetedi.
Senatorlar sondaı-aq Nur-Sultan qalasyndaǵy №1 arnaıy mektep-ınternatta boldy. Búgingi kúni mektepte 435 bala bilim alýda. Mektepte 125 oryndyq ınternat bar jáne 375 oqýshynyń bilim alýyna eseptelgen. Mektep kórý qabileti tómen balalarǵa arnaıy jolaqshalarmen, al tirek-qımyl apparaty buzylǵan balalar úshin pandýstar men tutqalarmen jabdyqtalǵan.
Senatorlar áleýmettik nysandardy aralaý barysynda tárbıelenýshilerdiń bilim alý, ornalasý jaǵdaıymen, oqý jáne medısınalyq kabınetterdiń materıaldyq-tehnıkalyq jabdyqtalýymen tanysty. Depýtattar sondaı-aq nysan basshylarymen problemalyq máselelerdi talqylady.
Múmkindigi shekteýli balalarǵa qatysty máselelerdi jan-jaqty talqylaý jáne dóńgelek ústelge daıyndyq ótkizý aıasynda depýtat N.Tóreǵalıvtiń Atyraý qalasyna issapary josparlanýda. Sapar barysynda senator Atyraý oblysy jumyspen qamtýdy úılestirý jáne áleýmettik baǵdarlamalar basqarmasynyń «№3 arnaıy áleýmettik qyzmet kórsetý ortalyǵyna» baratyn bolady.
