О́tken jyly «Jaǵalaý» shaǵyn aýdanynda osyndaı atpen otbasylyq densaýlyq ortalyǵy jumysyn bastady. Ol memlekettik-jeke menshik áriptestik aıasynda ashylǵan bolatyn. Maqsat – turǵyndardyń bastapqy medısınalyq-sanıtarlyq kómekti jaqyn jerden alýyn qamtamasyz etý.
Turǵyn úı kesheniniń birinshi qabatynda ornalasqan bólmede terapevt, pedıatr dárigeri, prosedýralyq, vaksınasııa, alǵashqy járdem jáne emdeý kabınetteri bar. Olardyń barlyǵy qajetti medısınalyq jabdyqpen jabdyqtalǵan.
«Mundaı ortalyqtar qala emhanalaryndaǵy júktemeni tómendetýge múmkindik beredi. Ortasha eseppen alǵanda emhanalar 50 myń adamǵa deıin qabyldaýy tıis, biraq týý men kóshi-qon prosesterin eskere otyryp, bul kórsetkish normadan 1,5-2 ese asady. Bizdiń ortalyqtarymyz qoljetimdilikti, úlken kezekterdi joıýdy, sondaı-aq pasıentterge qysqa merzimde kásibı medısınalyq kómek kórsetýdi qamtamasyz etedi», – dedi «Salaýatty Astana» JShS-niń dırektory Leıla Ishbaeva.
Bul emhana Nur-Sultan ákimdigi 2019-2023 jyldarǵa ázirlegen bastapqy medısınalyq-sanıtarlyq kómek júıesin (budan ári - BMSK) damytý tujyrymdamasynyń bóligi retinde ashyldy. Tujyrymdama qalanyń turǵyn aýdandarynda «Úıdegi dáriger» yqsham obektilerdiń ashylýy arqasynda bastapqy medısınalyq-sanıtarlyq kómek kórsetý jelisin odan ári damytýdy kózdeıdi. Osy ýaqyt aralyǵynda osyndaı 51 ortalyq ashylady dep josparlanýda. Olardyń 11-i 20 mınýttyq jerde medısınalyq mekemesi joq turǵyn alaptarda, 40-ǵy 2023 jylǵa deıin turǵyndar sanynyń eń kóp ósýi kútiletin 9 turǵyn úı alabynda boı kóteretin bolady.
«Úıdegi dáriger» ortalyqtarynda birinshi kezekte adamdarǵa alǵashqy kómek jáne keńes beretin ýchaskelik dárigerlerdiń bolýy mańyzdy. Sıfrlandyrýǵa kóshý arqyly biz azamattarǵa jańa tehnologııalardyń artyqshylyqtaryn jetkizgimiz keledi. Mysaly, naýqas dárigermen qashyqtyqtan keńes ala alady. Bizde WhatsApp arqyly sóılesý bólmeleri bar, olar arqyly júkti áıelderge, bir jasqa tolmaǵan sábıi bar analarǵa, múgedekterge keńes beremiz. Barlyq suraqtarǵa bólim meńgerýshisi, dáriger jáne bas medbıke jaýap beredi», – dedi Leıla Ishbaeva.
Jyl aıaǵyna qaraı Nur-Sultanda taǵy 30 «Úıdegi dáriger» ortalyǵy paıda bolady dep kútilýde.
