Qoǵamdyq densaýlyq saqtaý basqarmasynyń málimetinshe, júktilik tabıǵı jolmen, qosalqy reprodýktıvti tehnologııa qoldanylmaı-aq júzege asqan. Mundaı jaǵdaı akýsherlik tájirıbede sırek kezdesedi.
Bosaný júktiliktiń 32 apta 2 kúninde shuǵyl túrde kesar tiligi arqyly ótti. Túngi saǵat úsh shamasynda akýsher-gınekologtar, anestezıologtar jáne neonatologtardan quralǵan kópsalaly medısınalyq komanda jedel túrde jumyldyryldy.
Salmaǵy 1840 gramm, boıy 42 sm ul bala, salmaǵy 1680 gramm, boıy 43 sm taǵy bir ul bala, salmaǵy 1620 gramm, boıy 40 sm qyz bala dúnıege keldi. Ul balalarǵa Zańǵar men Aıbar, qyz balaǵa Ásel degen esim qoıyldy.
Ortalyq dırektorynyń uıymdastyrý-ádistemelik jumys jónindegi orynbasary Saltanat Erbýlatovanyń aıtýynsha, medısınalyq ujymnyń úılesimdi ári kásibı jumysynyń arqasynda bosaný asqynýsyz ótti. Shala týǵan sábıler ómiriniń alǵashqy mınýtynan bastap qarqyndy baqylaýǵa alynyp, arnaıy em qabyldady jáne apparat arqyly tynys alýǵa qoldaý kórsetildi.
Úshemge jeke kútim beketi bólinip, sábıler táýlik boıy dárigerlerdiń baqylaýynda. Qazirgi tańda balalar salmaq qosyp keledi, jaǵdaıy turaqty dep baǵalanyp otyr, aldaǵy ýaqytta aýrýhanadan shyǵarýǵa daıyndalyp jatyr.
– О́tken jyly ortalyqta 22,5 myńnan astam naýqas qabyldanyp, 16,7 myńnan asa ana men jańa týǵan nárestege stasıonarlyq kómek kórsetildi. Jalpy, 9014 bosaný tirkeldi, onyń ishinde eki ret úshem dúnıege kelgen. Qaladaǵy merziminen buryn bosaný jaǵdaıynda medısınalyq kómektiń basym bóligi bizdiń ortalyqta kórsetiledi, – deıdi ortalyq mamandary.
