Kitap tanystyrylymyn Qazaq tarıhı qoǵamy men Joshy Ulysyn zertteý ǵylymı ınstıtýty ótkizdi. Uıymdastyrýshylar mundaı kezdesýler halyqaralyq ǵylymı yntymaqtastyqty nyǵaıtyp, zertteýshiler, baspagerler men oqyrmandar arasyndaǵy baılanysty kúsheıtetinin atap ótti.
Kesh barysynda amerıkalyq tarıhshy ári antropolog Djek Ýezerfordtyń «Shyńǵys han jáne qazirgi álemniń qalyptasýy» atty eńbeginiń qazaq tilindegi nusqasy tanystyryldy. Álemge tanymal kitap alǵash ret qazaq tiline aýdarylyp otyr. Buǵan deıin eńbek 20-dan astam tilde jaryq kórgen.
Kitapta Mońǵol ımperııasynyń qazirgi álemniń qalyptasýyna áseri, halyqaralyq saýda joldarynyń damýy, dıplomatııalyq baılanystar men Shyǵys pen Batys órkenıetteri arasyndaǵy mádenı yqpaldastyq týraly baıandalady.
Sonymen qatar tarıhshy Djý-Iýp Lıdiń «Túrki halyqtary álem tarıhynda» atty kitaby da oqyrmanǵa tanystyryldy. Eńbek túrki halyqtarynyń tarıhy men Eýrazııa keńistigindegi biregeıliktiń qalyptasý máselelerine arnalǵan.
Steppe and World Publishing House baspasynyń negizin qalaýshy Raısa Saıran Qadyr Qazaqstandaǵy aýdarma ádebıet pen ǵylymı-kópshilik baspa jobalarynyń damýy jóninde sóz sóıledi.
«Biz úshin dala tarıhynyń halyqaralyq ǵylymı dıalogtyń bir bóligine aınalǵany mańyzdy. Mundaı is-sharalar zertteýshilerdi, baspagerler men oqyrmandardy biriktiredi. Qazir dala órkenıetin zertteý tarıhı sana men gýmanıtarlyq ǵylymdy damytý turǵysynan erekshe ózekti», dedi uıymdastyrýshylar.
