Búgin Astana qalasyndaǵy «Qazmedıa» ortalyǵynda Olımpıada oıyndarynyń teletranslıasııasyna arnalǵan resmı tanystyrylym ótti. Is-sharaǵa Mádenıet jáne aqparat mınıstrligi men Týrızm jáne sport mınıstrliginiń ókilderi, tanymal sportshylar men sala ardagerleri, sport jýrnalısteri, sondaı-aq oıyndardy júrgizetin kommentatorlar qatysty.
Qysqy Olımpıada oıyndarynyń júldegeri, Qazaqstan tarıhyndaǵy qysqy Olımpıadada altyn medal ıelengen tuńǵysh sportshy Vladımır Smırnov baılanysqa shyǵyp, ulttyq qurama múshelerine sáttilik tilep, olarǵa zor senim artatynyn atap ótti.
Prezıdent qysqy Olımpıadaǵa qatysatyn ulttyq qurama múshelerine Memlekettik týdy tapsyrdy
Sonymen qatar elordadaǵy qysqy sport túrlerine mamandanǵan sport keshenderinen tikeleı qosylymdar uıymdastyrylyp, short-trek, mánerlep syrǵanaý jáne bıatlon sport túrleri boıynsha jattyǵatyn sportshylarmen suhbattar júrgizildi. Is-shara sońynda Olımpıada oıyndaryna qatysatyn sportshylar tikeleı efırge qosylyp, óz pikirleri men daıyndyq barysy týraly oı bólisti.
Baıraqty básekeniń teletranslıasııasy resmı ashylý saltanatynan eki kún buryn bastalady. Alǵashqy bolyp hokkeıden áıelder quramalary men kerlıng sportshylary jarys jolyna shyǵady. Italııadaǵy dodada elimizdiń atynan 10 sport túrinen 36 sportshy el namysyn qorǵaıdy.
Qysqy Olımpıada oıyndarynyń ashylý saltanaty 6 aqpan kúni saǵat 00:00-de Qazaqstan jáne Qazsport telearnalary arqyly tikeleı efırde kórsetiledi.
Eki telearnanyń efırinde Olımpıada oıyndaryn 22 kommentator júrgizedi. Olardyń qatarynda Eseı Jeńisuly, Sergeı Raılıan, Rýslan Baqytjan, Ersin Erikuly, Azat Smaǵulov, Lılıana Áljanova jáne ózge de kommentatorlar bar.
El sportshylary qysqy Olımpıada oıyndarynda qandaı kıim úlgisimen óner kórsetedi?
Sondaı-aq Qazaqstan jáne Qazsport telearnalarynan kún saıyn «Olımpıada oıyndarynyń sholýy» baǵdarlamasy, al Qazsport arnasynan tikeleı efırde «Mılan–Kortına-2026» stýdııalyq baǵdarlamasy kórermenge jol tartady.
