Foto: Energetıka mınıstrligi
Energetıka mınıstrliginiń málimetinshe, keńeske «QazaqGaz» UK» AQ, «PSA» JShS, NCOC kompanııasy aksıonerleriniń basshylyǵy, sondaı-aq jobany iske asyrýǵa qatysatyn ózge de múddeli uıymdardyń ókilderi qatysty.
Energetıka mınıstri Erlan Aqkenjenov Qashaǵandaǵy qýattylyǵy 2,5 mlrd tekshe metr bolatyn gaz óńdeý zaýytyn salý jobasy naqty iske asyrý kezeńine ótkenin atap ótti.
Keńes barysynda jobanyń aǵymdaǵy jaı-kúıi, múddeli taraptar arasyndaǵy úılestirý máseleleri, sondaı-aq nysandy belgilengen merzimde paıdalanýǵa berýdi qamtamasyz etýge baǵyttalǵan sharalar talqylandy.
Mınıstr gaz óńdeý zaýytyn salý jobasynyń elimizdiń gaz salasyn damytý úshin strategııalyq mańyzǵa ıe ekenin jáne Memleket basshysy men Úkimettiń erekshe baqylaýynda turǵanyn atap ótti.
Sonymen qatar Úkimettiń qaýlysymen jobanyń EPC-merdigeri retinde China National Chemical Engineering Sixth Construction Company Kazakhstan Branch jáne China Wuhuan Engineering Corporation Ltd kompanııalarynan quralǵan konsorsıým aıqyndalǵany atap ótildi.
«Keńes qorytyndysy boıynsha Erlan Aqkenjenov jobaǵa qatysýshy barlyq taraptarǵa jumystardy tıimdi úılestirýdi jáne jobany iske asyrý merzimderin saqtaý úshin syndarly ózara is-qımyldy qamtamasyz etýdi tapsyrdy. Sondaı-aq «QazaqGaz» UK» AQ-na jobany iske asyrý barysy, qabyldanyp jatqan sharalar jáne týyndaǵan máseleler týraly aqparatty jedel túrde sheshýge yqpal etý maqsatynda Energetıka mınıstrligine aı saıyn usynyp otyrý tapsyryldy», delingen habarlamada.
Eske salaıyq, 2028 jyly Qarashyǵanaqta gaz óńdeý zaýyty iske qosylatyny aıtylǵan.
