Palata spıkeri jas mamandardy quttyqtaı kele, Memleket basshysynyń bastamasymen elimizde aýqymdy jańǵyrý úderisteri júzege asyrylyp jatqanyn atap ótti. Keshendi jumystyń dáıekti jalǵasy retinde konstıtýsııalyq reforma júrgizilip, jańa Konstıtýsııa qabyldandy. Bul – Qazaqstan tarıhyndaǵy mańyzdy oqıǵa, memlekettiń uzaqmerzimdi turaqtylyǵynyń berik negizi jáne jahandyq syn-qaterlerge ýaqtyly berilgen jaýap.
Sondaı-aq eldi jańǵyrtý jáne saıası júıeni keshendi túrde reformalaý jolynda zańnamalyq bastamalardy qamtamasyz etýmen qatar, bilikti ári jaýapty mamandardyń da róli erekshe ekenine basa mán berildi. Jahandyq tehnologııalyq jáne áleýmettik transformasııalar dáýirinde jańǵyrý mıssııasy negizinen jas býynǵa júkteledi. Sondyqtan Máýlen Áshimbaev elimizdegi jetekshi joǵary oqý oryndarynyń biriniń dıplomy joǵary bilim alǵanyn rastaıtyn qujat qana emes, qoǵam aldyndaǵy úlken jaýapkershilik ekenin aıtty.
«Jańa Konstıtýsııany qabyldaý arqyly elimiz saıası, ekonomıkalyq jáne áleýmettik damýdyń jańa kezeńine qadam basty. Prezıdent Qasym-Jomart Toqaevtyń Ádiletti jáne Progressıvti Qazaqstan qurýǵa baǵyttalǵan saıası baǵdary – uzaqmerzimdi reformalar baǵdarlamasy. Ol ekonomıkany ártaraptandyrý, memlekettik basqarý ınstıtýttaryn nyǵaıtý, ǵylym men bilimge, bıznes pen azamattyq qoǵamǵa qoldaý kórsetý sııaqty mańyzdy mindetterdi sheshý úshin búkil qoǵamnyń jumylýyn jáne belsendi qatysýyn talap etedi. Osy úderiske sizderdiń ýnıversıtetterińizdiń túlekteri qazirdiń ózinde eleýli úles qosyp keledi. Qazaqstandaǵy alǵashqy tehnologııalyq «unicorn» kompanııa – «Higgsfield AI» sonyń jarqyn kórinisi. Atalǵan kompanııa komandasynyń 90 paıyzy – NU túlekteri. Bul – elimizdiń adam kapıtalynyń joǵary básekege qabiletti jáne ýnıversıtettik ortanyń sapaly deńgeıde ekeniniń aıqyn dáleli», dedi Máýlen Áshimbaev.
Senat tóraǵasy óz sózinde NU ýnıversıteti otandyq ǵylymdy, ınnovasııalardy jáne adam kapıtalyn damytý jolynda mańyzdy ról atqaratynyn atap ótti. Sondaı-aq ol ýnıversıtet óziniń basty mıssııa- syn nátıjeli júzege asyryp kele jatqanyna nazar aýdaryp, atalǵan oqý orny Qazaqstanda ozyq zertteý mádenıetin qalyptastyrýǵa, zamanaýı akademııalyq standarttardy engizýge jáne elimizdiń joǵary bilim júıesin jańǵyrtýǵa úlken yqpalyn tıgizip otyrǵanyn atap ótti.
Saltanatty rásim barysynda Máýlen Áshimbaev jas mamandarǵa ómirlik baǵdar bolatyn mańyzdy baǵyttarǵa da toqtalyp ótti. Bul oraıda Senat tóraǵasy kásibı biliktilik, durys qundylyqtar jáne úzdiksiz ózin-ózi jetildirý tabysty mansaptyń negizi ekenin aıtty.
